Англия Кубогининг 1/4 финали Чемпионшип вакили «Суонси Сити» «Манчестер Сити»ни қабул қилди. Суонсидаги «Либерти» стадионида кечган учрашув 3:2 ҳисобида меҳмонлар фойдасига ҳал бўлди.
Ўйиндаги биринчи гол муаллифи «Суонси» яримҳимоячиси Мэтт Граймз бўлди, у 20-дақиқада пенальтидан унумли фойдаланди. Танаффусга қадар мезбонлар ҳужумчиси Берсант Целин иккинчи голни урди.
Иккинчи бўлим ўрталарида «Манчестер Сити» ҳавбеки Бернарду Силва биринчи жавоб голини урди. 78-дақиқада мезбонлар дарвозабони Кристоффер Нордфельдт ўз дарвозасини ишғол этиб қўйиб, ҳисоб тенглашишига сабабчи бўлди. Серхио Агуэро ўйин охирида «шаҳарликлар»га ғалаба келтирган голни урди.
Аммо видеода кўриш мумкинки, аргентиналик ҳужумчи гол ураётганида офсайд ҳолатида бўлган.
Goal Man City 3 Swansea 0 #facup #EmiratesFACup offside tho #aguero pic.twitter.com/IUv1zvCYXS
— mumblesports (@mumblesports) 16 марта 2019 г.
Ўйиндан кейин меҳмонлар устози Хосеп Гвардиола учинчи гол офсайддан урилганини тан олган.
«Ярим финалга чиққанимиз зўр бўлди. Англия Кубогида жуда кўп жамоалар қатнашади. Биз шу босқичгача етиб келганимиздан хурсандмиз.
Ўйин ақлбовар қилмас даражада кечди. Биз яхши бошладик, аммо ўз имкониятларимиздан фойдалана олмадик. Кейин эса иккита гол ўтказиб юбордик. Танаффусда биз гол уришимиз кераклигини муҳокама қилдик. Дарвозабон зўр ўйнади! Биз қанча зарба йўллаганимизни ҳам ҳисоблай олмай қолдим. Англия Кубогида ҳар қандай натижа рўй бериши мумкин.
«Суонси»нинг ҳолатини ҳис қилиб турибман, у ерда офсайд бор эди. Афсусдаман. Лекин тушунмайман, нега стадионда VAR қурилмаси йўқ. Умид қиламанки, кейинги мавсумда VAR бўлади», — деган Гвардиола BBC учун интервьюсида.
Қайд этиш керакки, Англия Кубоги ўйинларида видеотакрорлардан фойдаланиш йўлга қўйилган. Аммо бундай қурилмалар ўрнатилиши фақат Англия Премьер-Лигаси иштирокчилари учун мажбурий саналади. «Суонси» эса айни вақтда чемпионшипда иштирок этмоқда.
«Манчестер Сити» Англия Кубогида иштирокини давом эттиради, «Суонси» турнирни тарк этди. Бунгача Англия Кубогининг 1/2 финалига «Уотфорд» ва «Вулверҳемптон» йўл олганди. Бу жамоалар мос равишда «Кристал Пэлас» ҳамда «Манчестер Юнайтед»ни мағлуб этишганди. Яримфиналнинг яна бир иштирокчиси «Миллуол» ва «Брайтон» учрашувида аниқланади.
