АҚШ транспорт вазирлиги Boeing 737 Max’нинг сертификатланишини текшира бошлади – WSJ

АҚШ транспорт вазирлиги АҚШ федерал авиация бошқармаси Boeing 737 Max лайнерларига парвозга рухсат беришда хавфсизлик меъёрларини бузган-бузмаганини аниқлаш мақсадида текширув ўтказмоқда. Бу ҳақда The Wall Street Journal нашри хабар берди. 

Нашрнинг вазирликдаги манбалари маълумотларига кўра, ушбу текширув биринчи навбатда самолёт тумшуғининг горизонтга нисбатан ҳолатини автоматик аниқлаш ва бу ҳолатни тўғрилашда қўлланувчи тизимларга тааллуқли бўлади. Бу тизимдаги носозликлар Индонезияда 2018 йил октябрда Boeing 737 Max 8 авиаҳалокатига олиб келган сабаблардан бири бўлиши мумкин. Вазирлик ходимлари бу тизимнинг нотўғри ишлаши 10 март куни Эфиопияда юз берган авиаҳалокатга олиб келган бўлиши мумкинлигини аниқлашмоқчи.

Вазирлик ҳузуридаги назорат қилувчи идоралар авиация бошқармасининг икки ходимидан Boeing 737 Max сертификатланишига тааллуқли барча компьютер файллари ва ҳужжатларни бус-бутун сақлашни талаб қилган. Вазирлик лайнернинг барча техник кўрсаткичлари мутахассислар томонидан тегишли тарзда таҳлил қилинганини аниқламоқчи. Бу ишни жумладан бошқарманинг Сиэтлдаги бўлими ходимлари бажаришган. 

17 март куни Эфиопия транспорт вазири Дагмавит Могес Эфиопияда ҳалокатга учраган Boeing 737 Max 8 бортёзгичларидан олинган маълумот ушбу ҳалокат Индонезияда шу моделдаги лайнернинг ҳалокатига ўхшашлигидан дарак бераётганини маълум қилди. Могеснинг таъкидлашича, бу хулосаларни ҳам эфиопиялик, ҳам америкалик терговчилар тасдиқлашган.

Эфиопиядаги авиаҳалокатда 157 киши, Индонезиядагида 189 киши ҳалок бўлган. Эфиопиядаги авиаҳалокатнинг аниқ сабаблари ҳозирча ўрнатилмаган. Индонезияда қулаган самолёт бортёзгичларидан олинган маълумотларга кўра эса лайнернинг қулаши вақтида унинг приборлари ишида бир нечта носозлик кузатилган.