«Ювентус»нинг илк мағлубияти, голларга бой тарзда ўтган Милан дербиси ва Италия чемпионатида турнинг бошқа воқеалари

Дам олиш кунлари Италия чемпионатида 28-тур ўйинлари ўтказилди. Унда эътиборга лойиқ бўлган бир қанча воқеалар юз берди.

«ЮВЕНТУС»НИНГ ИЛК МАҒЛУБИЯТИ

«Ювентус» сафарда «Женоа» билан ўйнади ва мавсумда илк маротаба ютқазди. Қачонлардир бу воқеа юз бериши керак эди. Аллегри Чемпионлар Лигасидаги «Атлетико»га (3:0) қарши оғир ўйиндан сўнг, етакчиларга дам берди, аммо таркиб барибир асосийга яқинроқ бўлиб қолди.

Биринчи бўлим тенг курашлар остида ўтди ва хавфли вазиятлар деярли юз бермади. Иккинчи бўлимда туринликлар фаолроқ ҳаракат қилдилар ва навбатдаги ғалабани қўлга киритишга яқинроқ эди. Бироқ, «Женоа» бош мураббийи Чезаре Пранделли майдонга захирадан Пандев ва Стурарони туширди. Бу қарор ўйин тақдирини ҳал қилди. 72-дақиқада Стураро узоқ масофадан аниқ зарба йўллаб, чиройли гол уришга муваффақ бўлди. Орадан 10 дақиқа ўтгач, Пандевнинг ўзи Куаме бошлаган ҳужумни мантиқий якунига етказиб, ҳисобдаги фарқни оширди. Қолган дақиқаларда «Ювентус»нинг вазиятни ўнглаш учун қилган барча ҳаракатлари самарасиз кетди.

Қайд қилиш жоизки, 1-даврада «Ювентус» илк маротаба «Женоа»га қарши ўйинда очко йўқотган эди. Энди эса мавсумда илк маротаба ютқазди.

Бу натижадан сўнг, «Ювентус» 75 очко билан 1-ўринда, «Женоа» эса 33 очко билан 11-ўринда бормоқда.

Женоа – Ювентус 2:0 (0:0, 2:0)
17 март, 14.30, «Луижи Феррарис» стадиони
Голлар: 1:0 – 72 Стураро, 2:0 – 81 Пандев.
Женоа – Раду, Педру Перейра, Ромеро, Зуканович, Кришито, Лерагер, Радованович (Велозу, 75), Ролон, Лазович (Стураро, 70), Санабрия (Пандев, 60), Куаме.
Ювентус – Перин, Касерес, Бонуччи, Ругани, Пьянич, Жоау Канселу (Бернардески, 60), Алекс Сандро, Жан, Бентанкур (Спинаццола, 77), Дибала, Манжукич (Кин, 73).
Огоҳлантиришлар: Ромеро (3), Алекс Сандро (5), Касерес (23), Пандев (82), Жан (85).

МИЛАН ДЕРБИСИДА «ИНТЕР» ҒАЛАБА ҚОЗОНДИ

Турнинг марказий ўйини «Сан-Сиро»да ўтказилди. «Милан» ва «Интер» клублари Италияда «Дерби делла Мадоннина» деб номланадиган баҳсда куч синашдилар. Жамоаларнинг турнир жадвалида ёнма-ён бораётгани ва Чемпионлар Лигаси йўлланмаси учун курашаётгани ўйинга қўшимча кескинликни бағишлади.

3-дақиқадаёқ «Интер» ҳисобни очишга муваффақ бўлди. Перишич – Мартинес комбинациясини Весино аниқ зарба билан якунлаб, тўпни дарвозага киритди. Орадан бироз вақт ўтгач, Шкриньяр «Милан»ни «кечирди». У жуда яқин масофадан тўпни дарвозага йўллай олмади. Иккинчи бўлим бошланиши билан «Интер» ҳисобдаги фарқни оширди. Де Врей бурчак зарбасидан етказилган тўпни боши билан дарвозага жойлади.

57-дақиқада Бакайоко боши билан аниқ зарба йўллаб ҳисобни қисқартирган эди. Аммо орадан 10 дақиқа ўтгач, Мартинес пенальтини бехато амалга ошириб, 2та тўп фарқни тиклади. Бу ҳисоб атиги 4 дақиқа ушланиб турди – жарима майдони ичидаги пала-партишликдан фойдаланиб, Мусаккьо яқин масофадан гол урди. 2:3 ҳисоби ўйин охирига қадар ўзгармади ва «Интер» жуда муҳим ғалабани қўлга киритди.

Бу натижадан сўнг, «Интер» 53 очко билан 3-ўринга чиқиб олди, «Милан» эса 51 очко билан 4-ўринга тушди.

Милан – Интер 2:3 (0:1, 2:2)
17 март, «Жузеппе Меацца (Сан-Сиро)» стадиони
Голлар: 0:1 – 3 Весино, 0:2 – 51 де Врей, 1:2 – 57 Бакайоко, 1:3 – 67, пенальти Мартинес, 2:3 – 71 Мусаккьо.
Милан – Доннарумма, Калабрия, Мусаккьо, Романьоли, Родригес (Кутроне, 58), Кессиэ (Конти, 69), Бакайоко, Лукас Пакета (Кастильехо, 46), Сусо, Пёнтек, Чалханоглу.
Интер – Ханданович, Д`Амброзио, де Врей, Шкриньяр, Асамоа, Весино (Раноккия, 90), Брозович (Валеро, 73), Гальярдини, Политано (Кандрева, 84), Мартинес, Перишич.
Огоҳлантиришлар: Брозович (14), Родригес (32), Романьоли (66), Весино (79), Сусо (79), Конти (89), Гальярдини (90).

«НАПОЛИ» МУВАФФАҚИЯТСИЗ СЕРИЯГА БАРҲАМ БЕРДИ

«Наполи» ўз майдонида «Удинезе» билан ўйнади ва 4:2 ҳисобида қийинчилик билан ғалаба қозонди. Аввалги 2 турдаги мағлубият ва дурангдан сўнг, неаполликлар ўз мухлисларини хурсанд қилишга муваффақ бўлишди.

1-бўлим голларга бой тарзда ўтди. Дастлаб «Наполи» Юнус ва Кальехон голлари эвазига 2:0 ҳисобида олдинга ўтиб олди. Бироқ, қисқа муддатли хотиржамлик мезбонларга қимматга тушди. «Удинезе» 6 дақиқа ичида Лазанья ва Фофана голлари эвазига ҳисобни тенглаштира олди. Иккинчи бўлимни «Наполи» яхши ўтказди ва яна 2та гол уриб, якунда ғалаба қозонишга муваффақ бўлди. 57-дақиқада Милик, 70-дақиқада Мертенс гол уриб, жамоасининг ғалабасига ҳисса қўшишди.

Бу натижадан сўнг, «Наполи» 60 очко билан 2-ўринда, «Удинезе» эса 25 очко билан 16-ўринда бормоқда.

Наполи – Удинезе 4:2 (2:2, 2:0)
17 март, «Сан-Паоло» стадиони
Голлар: 1:0 – 17 Юнус, 2:0 – 26 Кальехон, 2:1 – 30 Лазанья, 2:2 – 36 Фофана, 3:2 – 57 Милик, 4:2 – 69 Мертенс.
Наполи – Оспина (Мерет, 44), Малькюи (Хюсай, 86), Максимович, Кулибали, Гулям, Кальехон, Аллан, Зелиньски, Юнус (Верди, 56), Милик, Мертенс.
Удинезе – Муссо, Ларсен (Окака Чука, 86), Трост-Эконг, Мандрагора, тер Авест (Де Майо, 68), Фофана, Сандро (Ингельссон, 64), де Пауль, Зегелар, Пуссетто, Лазанья.
Огоҳлантиришлар: Зелиньски (11), Сандро (13).

28-ТУРНИНГ БАРЧА НАТИЖАЛАРИ

15 март
Кальяри – Фиорентина 2:1 (0:0, 2:1)
Голлар: 1:0 – 52 Жоао Педро, 2:0 – 66 Чеппителли, 2:1 – 88 Кьеза.

16 март
Сассуоло – Сампдория 3:5 (1:3, 2:2)
Голлар: 0:1 – 15 Дефрель, 0:2 – 36 Куальярелла, 1:2 – 38 Бога, 1:3 – 39 Линетти, 1:4 – 46 Прат, 2:4 – 63 Данкан, 2:5 – 72 Габбьядини, 3:5 – 90 Эл-Бабакар.

СПАЛ – Рома 2:1 (1:0, 1:1)
Голлар: 1:0 – 22 Фарес, 1:1 – 53, пенальти Перотти, 2:1 – 59, пенальти Петанья.

Торино – Болонья 2:3 (1:2, 1:1)
Голлар: 1:0 – 6, автогол Пульгар, 1:1 – 29 Поли, 1:2 – 34, пенальти Пульгар, 1:3 – 64 Орсолини, 2:3 – 89 Иццо.

Четлатишлар: Войнович (88, Болонья), Айна (90, Торино).

17 март
Женоа – Ювентус 2:0 (0:0, 2:0)
Голлар: 1:0 – 72 Стураро, 2:0 – 81 Пандев.

Лацио – Парма 4:1 (4:0, 0:1)
Голлар: 1:0 – 22 Марушич, 2:0 – 26, пенальти Луис Альберто, 3:0 – 38 Луис Альберто, 4:0 – 44 Лулич, 4:1 – 77 Спрокати.

Аталанта – Кьево 1:1 (0:1, 1:0)
Голлар: 0:1 – 32 Межорини, 1:1 – 55 Иличич.

Эмполи – Фрозиноне 2:1 (2:0, 0:1)
Голлар: 1:0 – 20, пенальти Капуто, 2:0 – 38 Паяч, 2:1 – 70 Вальцаниа.

Наполи – Удинезе 4:2 (2:2, 2:0)
Голлар: 1:0 – 17 Юнус, 2:0 – 26 Кальехон, 2:1 – 30 Лазанья, 2:2 – 36 Фофана, 3:2 – 57 Милик, 4:2 – 69 Мертенс.

Милан – Интер 2:3 (0:1, 2:2)
Голлар: 0:1 – 3 Весино, 0:2 – 51 де Врей, 1:2 – 57 Бакайоко, 1:3 – 67, пенальти Мартинес, 2:3 – 71 Мусаккьо.

А СЕРИЯ ЖАДВАЛИ

А СЕРИЯ ТЎПУРАРЛАРИ

21 - Фабио Куальярелла (Сампдория, 6 пен)
20 - Кшиштоф Пёнтек (Женоа/Милан, 2)
19 - Криштиану Роналду (Ювентус, 5)
17 - Дуван Сапата (Аталанта, 1)
15 - Аркадиуш Милик (Наполи)
13 - Франческо Капуто (Эмполи, 3), Чиро Иммобиле (Лацио, 3)
11 - Андреа Петанья (СПАЛ, 3)
10 - Андреа Белотти (Торино, 4), Леонардо Паволетти (Кальяри)

28-ТУРНИНГ РАМЗИЙ ТЕРМА ЖАМОАСИ

29-ТУР ЎЙИНЛАРИ

31 март
Болонья - Сассуоло
Интер - Лацио
Кьево - Кальяри
Парма - Аталанта
Рома - Наполи
Сампдория - Милан
Удинезе - Женоа
Фиорентина - Торино
Фрозиноне - СПАЛ
Ювентус - Эмполи

«Чипта пулини қайтаринг!» - «Женоа» мухлисларининг ғалати талаби

28-турдан ўрин олган «Женоа» - «Ювентус» ўйинидан олдин қизиқ воқеа юз берди.

«Луижи Феррарис»да ўтадиган баҳс учун чиқарилган барча чипталар бир неча кун олдин сотиб юборилган эди. Аммо, Криштиану Роналду «Ювентус» қайдномасига киритилмагач, маҳаллий мухлислар «Женоа» офисига қўнғироқ қилиб, чипталар учун тўланган пулни қайтаришни талаб қилишган. Клуб раҳбарияти эса бунинг иложи йўқлигини маълум қилган.

Қизиғи шундаки, «Женоа» бу ўйинда «Ювентус»ни 2:0 ҳисобида мағлуб этишга муваффақ бўлди. Бу туринликларнинг А Серия жорий мавсумидаги илк мағлубияти бўлди.

28-турда юқори сермаҳсуллик намойиш қилинди

А Серия 28-турида жамоалар жуда кўп гол уриб, мухлисларни хурсанд қилишга муваффақ бўлишди.

Ўтказилган 10та ўйинда дарвозалар 42 марта ишғол қилинди. Бу эса ҳар бир ўйинда ўртача 4,2 гол демакдир.

Энг кўп гол «Сассуоло» - «Сампдория» ўйинида урилди - 8та. Мезбонлар бу баҳсда 3:5 ҳисобида мағлубиятга учрадилар.

Криштиану Роналду Италия чемпионатини юқори савияда эканини тан олди

Криштиану Роналду Италия чемпионатини ҳужумчилар учун энг мураккаб деб ҳисобламоқда.

«Испания ёки Португалияни соғинмадим. Мен ажойиб клубни тарк этдим, у ерда дўстларим қолди, аммо ҳозир Италияда ҳам шу нарсаларга эгаман. Менга кўчиб ўтиш қийин бўлмади – тақвимимиз жуда тиғиз, аммо бу ерда тўп тепиш мен учун жуда қизиқ ва шароитга ҳам тезда кўникиб олдим. А Серияда гол уриш Испаниядан қийинроқ, чунки у ерда жамоалар очиқ ўйин намойиш қилишади. Бу ерда эса эътибор ҳимояга қаратиларкан, ҳужумга эмас. Мен 5 йил Англияда ўйнаганман ва тан олишим керак, Италияда гол уриш анча қийин», — деб Роналду сўзларини келтирмоқда Marca.