8 апрелда Тошкентда ҳар йилги ADWEEK маркетинг ва реклама ҳафталиги бошланади. Ҳафталик тадбирлари мобайнида маркетинг ва реклама тўғрисида кўплаб мунозаралар ва тақдимотлар ўтказилади. Ушбу кенг миқёсдаги тармоқ ҳодисаси арафасида ташкилотчилар www.adweek.uz сайтига кирганларнинг энг оммавий саволларига жавоб беришади.
Нега ADWEEK ҳафталиги давомида бир вақтда иккита: маркетинг ва реклама бўйича конференция ўтказилади?
Кўпчиликка маълумки, реклама – бу маркетингнинг узвий қисми бўлиб, уларни ажратиш доимо баҳсларга сабаб бўлган. Аммо исталган корхонанинг маркетинг масалаларини фундаментал даражада ҳал қиладиганлар тушунишади: реклама билан шуғулланишдан олдин бозорни ўрганиш, компания имкониятларини аниқлаш ва ривожланиш стратегиясини тўғри танлаш бўйича катта ишларни амалга ошириш керак бўлади. Реклама корхона маркетинг стратегиясини татбиқ этишнинг бир қисмигина, холос (у ҳам ҳар доим эмас). Лекин, шу билан бирга, савияли реклама кампанияси бозорда муваффақиятли ўрин эгаллашнинг ва сотувлар жараёнининг ядросига айлана олганига кўпгина мисоллар мавжуд.
Шу сабабли маркетинг конференциясининг дастури кўпроқ бизнесни, унинг ривожланиш стратегиясини ва бренднинг бозорда оптимал ўрин эгаллаши имкониятларини ўрганиш масалаларини қамраб олади. Реклама конференцияси эса, ушбу бизнес-вазифаларни ҳисобга олган ҳолда, энг самарали креатив ечимларни яратиш масалаларини батафсил кўриб чиқади. Замонавий дунё конференция ўтказиш тажрибаси ҳам шундай тақсимланиш йўлини тутади.
Нега бу йил ADWEEK конференцияларида қатнашиш пулли?
Бепул ва пулли конференциялар ўртасидаги фарққа батафсил тўхталадиган бўлсак, у асосан ташкилотчилар кўзлаган мақсадларда кўринади. ADWEEK конференциялари ташкилотчилари учун пуллик иштирок шаклига ўтилиши ҳам дастурнинг ўзи, ҳам конференция аудиторияси шаклланишининг янги босқичи бўлди. Таклиф этилаётган контент сифатини ошириш ва халқаро миқёсдаги экспертларни маърузачи сифатида таклиф этиш вазифасини ўз олдига қўйгач, ташкилотчилар қаршисида юксак мотивацияланган, олинадиган ахборот ва амалий билимларнинг қадрини ҳис этадиган аудитория шаклланиши масаласи юзага келди. Бунда конференцияга кириш нархи рамзий кўринишда бўлиб, маркетинг, реклама ва умуман бизнес соҳасида фаол иш юритувчилар учун ҳамёнбоп саналади.
Қолаверса, амалда бепул конференциялар мутлақо бўлмайди. Ҳар қандай бепул конференция ташкил этилиши ортида шу тариқа ўзининг маркетинг ва реклама масалаларини ҳал этаётган компания, лойиҳа ёки бренд туради. ADWEEK спикерлари Ўзбекистонга ўз тажрибалари ва қимматли билимларини бизнинг мутахассисларимиз ҳамда маркетинг ва реклама соҳасига қизиқувчи ҳар ким билан ўртоқлашиш учун келадилар ва уларнинг аксарияти юртимизга биринчи бор ташриф буюради. Улар ўзларини, ўз компаниялари ёки мижозларини реклама қилмайдилар, интернетда эркин фойдаланишда учрамайдиган билимларни улашадилар. Бу анчайин қадрли ахборот манбаи ва унинг учун минимал, конференция чоғида ахборотни тўлақонли ҳамда самарали қабул қилиш ва фикр алмашишга шароит яратиш учун зарур миқдорда тўлов олинади.
