Шаҳрам Ғиёсовнинг навбатдаги рақиби аниқ бўлди, у камар учун рингга чиқади
Профессионал боксда фаолият олиб бораётган боксчи Шаҳрам Ғиёсов 26 апрель куни ўзининг навбатдаги жангини ўтказиши ҳақида хабар берилган эди. Айни пайтга келиб, унинг ушбу жангдаги рақиби аниқ бўлди.
Унинг навбатдаги рақиби америкалик Эммануэль Тэйлор бўлади. Мазкур баҳс 10 раундга мўлжалланган бўлиб, Ғиёсов бу жангда интерконтинентал камари учун рингга кўтарилади. Бўлажак бокс кечаси АҚШнинг Лос-Анжелес шаҳрида бўлиб ўтиши белгиланган.
GoSport.uz хабарига кўра, мазкур жанг WBA Intercontinental чемпионлик камари учун бўлиб ўтади ва 10 раундга мўлжалланган бўлади. Тўқнашув Калифорния штатининг Инглвуд шаҳрида жойлашган машҳур казино маркази Форум саройида бўлиб ўтади.
Маълумот учун Тэйлор профессионал боксда номдор боксчилардан бири бўлиб, ўз вақтида WBA International камари учун машҳур Эдриен Бронерга (33-4-1, 24 КО) қарши 10 раундлик жангда иштирок этиб очколар бўйича имкониятни бой берган. Шунингдек, Крис Алгиери (23-3, 8 КО) Антонио Ороско (27-1, 17 КО) каби машҳур боксчиларга қарши рингга чиққан.
Тэйлорнинг энг асосий жанги эса сўнгги жанги бўлиб қолмоқда. 2017 йилнинг 5 май куни у Лукас Мартин Маттисга (39-5, 36 КО) WBA Inter-Continental ва WBO International чемпионлик камарлари учун рингга чиқиб, техник нокаут эвазига имкониятни бой берганди. Орадан қарийб икки йил вақт ўтиб у яна рингга қайтмоқда.
Эслатиб ўтамиз, мазкур бокс оқшомининг марказий жангида иккинчи ярим енгил (-55,34 кг) вазн тоифасининг WBA чемпионлик камари соҳиби америкалик Даниэл Роман (26-2-1, 10 КО) ва IBF камари эгаси австралиялик Теренс Доэни (21-0, 15 КО) камарларни бирлаштирувчи жангда иштирок этади. Бундан ташқари уларнинг бўлажак рақиби Муроджон Аҳмадалиев (5-0, 4 КО) ҳам рингга кўтарилиши кўзда тутилган.
Инглвудда бўлиб ўтадиган мазкур бокс оқшоми Matchroom Boxing промоутерлик компанияси раҳбари Эдди Ҳирн ва Thompson Boxing Promotions компанияси раҳбари Кен Томпсон томонидан ташкил қилинмоқда.
Эслатиб ўтамиз, сўнгги марта Шаҳрам Ғиёсов 23 февраль (Тошкент вақти билан 24 февраль) куни Мексикада маҳаллий боксчи Эдгар Пуэртани (25-12-1, 19 КО) бешинчи раундда техник нокаут эвазига мағлубиятга учратганди.
Мавзуга оид
13:47 / 11.09.2024
Қирғизистон президенти ўзбекистонлик бокс мураббийи Акмал Ҳасановга автомобил совға қилди
09:00 / 21.08.2024
Уришқоқ боладан олимпиада чемпионлигигача — Асадхўжа Мўйдинхўжаев хонадонидан репортаж
18:29 / 16.08.2024
ХОҚ ва IBA «жанги»: Бокс Лос-Анжелес-2028 Олимпиадасидан ўрин олмайдими?
09:05 / 16.08.2024