Ўзбекистон миллий жамоаси ва БААнинг «Шаржа» клуби яримҳимоячиси Отабек Шукуров шу ҳафта бошида «China cup-2019» халқаро мусобақасидан ўрин олган Хитойга қарши ўйинда (1:0) жароҳат олиб, майдонни эрта тарк этганди. Кейинчалик текширувлар натижасида Шукуровнинг болдир суяги пастдан сингани ва у камида 2 ой майдонга туша олмаслиги маълум бўлди.
ЎФА расмий сайтининг хабар қилишича, Шукуров Лондонда операция қилинадиган бўлган. Ҳозирда у ҳужжатлар билан боғлиқ расмиятчиликлар тугашини кутмоқда. Жарроҳлик амалиёти қачон ўтказилиши ҳақида маълум қилинмаган.
«Миллий жамоа шифокорлари маҳаллий шифохонада Отабек Шукуровга дастлабки тиббий ёрдамни кўрсатгач, футболчи даволанишни давом эттириш учун ўз клуби ихтиёрига йўл олди. Чунки бундай ҳолларда футболчи жароҳатини даволаш учун клуб билан маслаҳатлашган ҳолда иш тутиши талаб этиларди. «Шаржа» клуби шифокорлари Отабек Шукуровнинг жароҳатини кўздан кечириб, операция орқали даволашга қарор қилишди», – дейилган ЎФА хабарида.
Билдирилишича, 22 ёшли хавбекка жароҳат етказган хитойлик футболчи Веи Шихаодан ташқари, Хитой миллий жамоаси ёрдамчи мураббийи, шифокори ва менежери ҳам ундан хабар олиб, ҳужумчининг ҳаракатларидан афсусда эканликларини айтиб ўтишган.
Аввалроқ Шихао Шукуровни йўқлаш учун Ўзбекистон миллий жамоаси жойлашган меҳмонхонага боргани хабар қилинганди. Шундан сўнг унинг клуби «Гуанчжоу Эвергранд» ушбу янги аъзосининг ҳаракатларини қоралаб, бир ойга футболдан четлатганди.
Отабек мазкур ҳолат юзасидан Twitter саҳифасида Хитой ОАВ ва ўзига жароҳат етказган футболчининг клубига мурожаат йўллаб, унда қуйидагиларни таъкидлади:
