Kun.uz таҳририятига Тошкент шаҳридан Умра ва Ҳаж сафарларига зиёратга бораётган кекса отахон ва онахонларнинг тиббий текширувдан ўтиши ва эмланиши билан боғлиқ мураккаб вазиятлар юзага келаётгани хусусида мурожаатлар келиб тушди.
Биз вазият билан яқиндан танишиш учун Тошкент шаҳри Мирзо Улуғбек туманидаги 5-сон оилавий поликлиникада бўлдик.
Бу ерда Тошкент шаҳридан Ҳаж ва Умрага борувчи барча (!) зиёратчилар якуний тиббий кўрикдан ўтказилиб, эмланар экан.
Бунинг учун қариялар аввало 5-поликлиниканинг ертўласига тушишар экан. Ертўлада уларнинг ўзи прописка қилинган туманлардаги тиббиёт бирлашмалари орқали тўплаган ҳужжатларини кўздан кечирилар экан. Қайд этиб ўтиш лозим, анчадан буён таъмирланмаган поликлиниканинг ертўласида кексалар диққинафас бўлиб ўтиришибди. Чунки уларга кутиш учун ажратилган жой шамоллатилмайди. Ўриндиқ эса ҳаммага ҳам етмайди.
Кейин поликлиниканинг биринчи қаватида зиёратчилар врачлар якуний кўригидан ўтказилиб, эмланар экан.
Ҳаж сафарига борувчилар учун ҳар куни 50 кишидан иборат навбат ҳосил қилинган. Биз борган куни (4 апрель) 6 апрель учун навбат шакллантирилиб, журналда рўйхат тузилаётган экан.
Умра сафарига бораётганлар учун рўйхат шакллантирилмасдан, жонли навбат орқали фуқаролар қабул қилинар экан.
Биз фуқароларни гапга тутдик. Улар бу масканга 2-3 марталаб қатнашга мажбур бўлишаётгани, навбатда туриш, кутиш билан боғлиқ маълум бир қийинчиликлар юзага келаётганини айтиб ўтишди. Агар ҳужжатларда камчилик топилса, уни тузатиб келиш учун яна вақт сарфланади. Зиёратчиларнинг аксарияти қариялар эканини ёдда тутинг.
