Словакияда депутатлар президентдан ўзлари қабул қилган қонунни имзоламаслигини сўрашди

Словакия парламенти депутатлари мамлакат президенти Андрей Кискадан ўзлари қабул қилган давлат рамзлари тўғрисидаги қонунга тузатишлар киритишни имзоламаслигини сўрашди. Ҳужжатда ўзга давлатлар мадҳиясини ижро этишга чекловлар киритилганлиги маълум бўлди.

Словакия миллий партияси томонидан таклиф қилинган қонунда жумладан спорт тадбирларида давлат рамзларидан фойдаланишни тартибга солиш кўзда тутилганди. Қонун моддаларидан бирида оммавий тадбирларда бошқа давлатларнинг мадҳияси фақатгина ўша давлатларнинг расмий делегациялари иштирокида ижро этиш белгиланган. Ушбу моддани бузганлик учун етти минг евро жарима кўзда тутилган.

Депутат Жолт Симон қонун Венгрия мадҳиясини Словакияда ижро этиш тақиқланиши икки давлат ўртасидаги кескинликка сабаб бўлишини қайд этди.

Яна бир депутат Бела Бугар эса 108 нафар депутат хатога йўл қўйганини билдирди. Депутат Петер Анталнинг фикрича, депутатлар «фақат» сўзига эътибор беришмаган ва бу сўз бошқа давлатлар мадҳиясини ижро этиш чекланишига сабаб бўлган.

Бугарнинг сўзларига кўра, президент уларнинг илтимосига жавобан қонунни имзолмаслигини билдирган. Андрей Киска депутатларни ўзлари овоз бераётган қонунларни ўқиб чиқишга чақирган.