Алихонов: Ўзбекистондаги АЭС ҳатто устига самолёт тушишига ҳам дош бера олади

Ўзбекистон Республикаси Олий Мажлиси Қонунчилик палатаси спикери ўринбосари Борий Алихонов Жиззах вилояти Фориш тумани аҳолисига ҳудудда қурилиши мўлжалланган АЭС ҳеч қандай таҳдид туғдирмаслигини кафолатлади.

«Биз қурмоқчи бўлган станция 9 баллик зилзилага бардош беради. Ҳаттоки, самолёт станция устига тушган тақдирда ҳам, у ўз ишини давом эттириши мумкин », - деди Алихонов якшанба кунги жамоатчилик эшитувларида.

Унинг сўзларига кўра, АЭС хавфсизлиги 21та пассив ва актив тизимлар билан таъминланади. Депутатнинг ишонтиришича, атроф-муҳитга ҳам ҳеч қандай таҳдид йўқ.

«Венгрияда сув Дунайдан олинади. Уни ҳеч қандай тозалашсиз қайта туширишади, сабаби радиоактив моддалар билан алоқаси бўлмайди. Гарчи у трансчегаравий сув ҳавзаси бўлса-да - Амударёдан кўра ҳажми икки баравар кўп. Бу жиҳатдан экологик хавфсизлик жуда юқори. Халқаро атом энергияси агентлиги «3+» технологиясини энг ишончли деб бекорга тан олгани йўқ», - дея қўшимча қилиб ўтди Алихонов.

Ўзбекистондаги биринчи АЭС ҳар бири 1 200 МВт қувватга эга «3+» авлодидаги 1200-сув энергетик реакторли энергоблокдан иборат бўлади. Биринчи энергоблокни 2028 йилгача ишга тушириш режалаштирилмоқда, иккинчиси - 2030 йил.

Ўзбекистон ва Россия атом электр станцияси учун қурилиш майдончасини аниқлади. Бу Жиззах вилоятининг Тузкон кўли яқинидаги ҳудуд бўлади.