Ҳукумат қарори: Қамаши тумани комплекс ривожлантирилади

Вазирлар Маҳкамасининг “2019-2020 йилларда Қашқадарё вилоятининг Қамаши туманини комплекс ривожлантириш чора-тадбирлари тўғрисида”ги қарори қабул қилинди.

Ҳужжат билан қуйидагиларни ўз ичига олувчи 2019-2020 йилларда Қашқадарё вилоятининг Қамаши туманини комплекс ижтимоий-иқтисодий ривожлантириш юзасидан қўшимча чора-тадбирлар дастури тасдиқланди:

2019-2020 йилларда Қашқадарё вилояти Қамаши туманини комплекс ривожлантириш чора-тадбирлари дастурининг мақсадли параметрлари ва молиялаштириш манбаларининг асосий кўрсаткичлари;

2019-2020 йилларда Қашқадарё вилояти Қамаши туманида саноат йўналишида амалга ошириладиган истиқболли инвестиция лойиҳаларининг манзилли рўйхати;

2019-2020 йилларда Қашқадарё вилоятининг Қамаши туманида хизматлар соҳаси ва сервисни ривожлантириш лойиҳаларининг манзилли рўйхати;

2019-2020 йилларда Қашқадарё вилояти Қамаши туманида қишлоқ хўжалиги йўналишида амалга ошириладиган истиқболли инвестиция лойиҳаларининг манзилли рўйхати;

2019-2020 йилларда Қашқадарё вилояти Қамаши туманида лалмикор ерларда барпо этиладиган янги интенсив технологияли боғ ва токзорларнинг манзилли рўйхати;

2019-2020 йилларда Қашқадарё вилояти Қамаши туманида муҳандислик коммуникация, йўл-транспорт инфратузилмасини такомиллаштириш, алоқа тармоқларини реконструкция ва модернизация қилиш ҳамда аҳолининг яшаш шароитларини яхшилаш бўйича чора-тадбирлар;

2019-2020 йилларда Қашқадарё вилояти Қамаши туманида таълим муассасалари, соғлиқни сақлаш, маданият ва бошқа турдаги ижтимоий соҳа объектларни қуриш, реконструкция қилиш ва мукаммал таъмирлаш бўйича инвестиция лойиҳаларининг манзилли рўйхати;

2019-2020 йилларда Қашқадарё вилояти Қамаши туманида ирригация ва мелиорация тизимини яхшилаш ва фойдаланишдан чиқариб юборилган ерларни фойдаланишга қайтариш чора-тадбирлари.

Дастур параметрларининг бажарилишини таъминлаш бўйича давлат ва хўжалик бошқаруви органлари, маҳаллий давлат ҳокимияти органлари, тижорат банклари фаолиятини мувофиқлаштириш ва мониторинг қилиш вазифаси Қашқадарё вилояти ҳокимлиги зиммасига юкланди.

Қашқадарё вилояти ҳокимлиги “Ўзбекипаксаноат” уюшмаси билан биргаликда Қамаши туманида ипакчиликни ривожлантириш учун 2 000 гектар тут плантациялари ташкил этилишини таъминлайди.

Қамаши туманининг табиий-иқлим шароитини инобатга олган ҳолда, Давлат ўрмон хўжалиги қўмитасининг 2 500 гектар ер майдонида писта плантацияларини ташкил этиш бўйича таклифи маъқулланди.

Қамаши туманида ишсиз аҳолини иш билан таъминлаш ва хонадонларда қишлоқ хўжалиги маҳсулотларини етиштиришни кўпайтириш мақсадида:

туманда куркачилик соҳасини ривожлантириш бўйича истиқболли лойиҳани амалга ошириш ҳамда 2019-2020 йилларда куркалар сонини 1 млн. бошга етказиш мақсадида “Ўзсаноатқурилишбанк” АТБ томонидан 6 000 хонадонга 600 минг бош курка етиштириш учун имтиёзли кредитлар ажратилишини таъминлайди ва шу мақсадда туманда минибанк очиш тавсия этилди;

“Паррандасаноат” уюшмаси “Ўзсаноаткурилишбанк” АТБ билан биргаликда 2019 йилда Қамаши туманида янгидан 3 та куркачилик агрофирмасини ташкил этиш бўйича чора-тадбирлар ишлаб чиқади;

Ветеринария ва чорвачиликни ривожлантириш давлат қўмитаси, Қашқадарё вилояти ҳокимлиги 2019-2020 йилларда Қамаши туманида чорвачиликка ихтисослаштирилган хўжаликлар томонидан аҳоли хонадонларига AT “Халқ банки” томонидан ажратиладиган имтиёзли кредитлари ҳисобидан чет элдан 2 минг бош наслли чорва моллари олиб келинишини таъминлайди;

туманда қуёнчилик соҳасини ривожлантириш ва қуёнлар сонини икки баробарга ошириш мақсадида 2019-2020 йилларда “Микрокредитбанк” АТБ томонидан 3 000 хонадонга 40 минг бош қуён сотиб олиш учун имтиёзли кредит ажратади.

Ўзбекистон Республикаси Маданият вазирлиги Қашқадарё вилояти ҳокимлиги билан биргаликда ташаббускор тадбиркорлар маблағлари ва Ташқи иқтисодий фаолият миллий банки имтиёзли кредит линияси ҳисобидан туманда замонавий истироҳат боғи ташкил этилишини таъминлайди.

Ўзбекистон Республикаси Автомобиль йўллари қўмитаси республика бюджети ҳисобидан туман ҳудудидаги Майданак обсерваториясига олиб борувчи автомобиль йўлини 2019 йилда тўлиқ таъмирлашни якунига етказишни таъминлайди.

Ўзбекистон Республикаси Автомобиль йўллари қўмитаси, Қашқадарё вилояти ҳокимлиги, Қамаши туман ҳокимлиги туман ҳудудидан ўтувчи халқаро ва маҳаллий аҳамиятга эга автомобиль йўлларини реконструкция қилиш ҳамда таъмирлаш ишларини ўз вақтида ва сифатли бажарилишини таъминлайди.

Ўзбекистон Республикаси Қурилиш вазирлиги Маданият вазирлиги билан биргаликда уч ой муддатда тумандаги XV асрга оид “Лангар ота” зиёратгоҳи ва “Лангар ота” масжидини таъмирлаш, ҳудудини ободонлаштириш ва кўкаламзорлаштириш концепциясини ишлаб чиқиб, Вазирлар Маҳкамасига киритади.

Ўзбекистон Республикаси Молия вазирлиги Инвестициялар ва ташқи савдо вазирлиги билан биргаликда ушбу объектлар бўйича таъмирлаш ишларини молиялаштириш республика бюджети маблағлари ҳисобидан амалга оширилишини таъминлайди.

Ўзбекистон Республикаси Инвестициялар ва ташқи савдо вазирлиги, Иқтисодиёт ва саноат вазирлиги, Молия вазирлиги ҳар йили Ўзбекистон Республикасининг Инвестиция дастурини шакллантиришда ушбу қарорда назарда тутилган марказлашган манбалар маблағлари ҳисобидан молиялаштириладиган, шу жумладан ҳудудлар ва иқтисодиёт тармоқларини ривожлантириш бўйича лойиҳалар инобатга олинишини таъминлайди.

Қашқадарё вилояти ҳокимлиги Ўзбекистон Республикаси Ер ресурслари, геодезия, картография ва давлат кадастри давлат қўмитаси билан биргаликда Дастурга киритилган инвестиция лойиҳаларининг амалга оширилиши учун ер участкаларини белгиланган тартибда ажратади.

“Ўзтрансгаз” АЖ, “Ҳудудий электр тармоқлари” АЖ Қашқадарё вилояти ҳокимлиги билан биргаликда Дастур доирасида инвестиция лойиҳаларини амалга оширувчи ишлаб чиқариш корхоналарининг табиий газ ва электр узатиш тармоқларига ўрнатилган тартиб ва муддатларда ўз вақтида уланишини ҳамда уларга мавжуд ресурс ва техник имкониятлардан келиб чиқиб, табиий газ ва электр энергияси етказиб берилишини таъминлайди.