АҚШда довул сабабли ҳарбий самолётлар Флоридадан бошқа штатларга кўчирилмоқда

Америкалик ҳарбийлар Атлантика океанида шаклланган “Дориан” довули яқинлашаётгани сабабли ўнлаб ҳарбий самолётларни Флоридадан бошқа штатларга кўчирмоқда. Бу ҳақда CNN телеканали хабар берди.  

Маълум қилинишича, гап тахминан 40 та, жумладан патрул ва разведка самолётлари ҳақида бормоқда. Улар Техас, Огайо ва Мичиганга жойлаштирилади. 

АҚШнинг довулларни кузатиш миллий маркази мутахассисларининг охирги баҳолашларига кўра, “Дориан” Флорида соҳилларига жорий ҳафта охирида ёки келаси ҳафтанинг бошига етиб боради. Бу вақтга келиб у кучайиб, 5 та мумкин бўлган тоифадан 4-тоифалик довулга айланиши кутилмоқда.

Ҳозирда довул Сан-Хуандан шимол томонда 355 км узоқликда бўлиб, Флорида томон 5,8 м/сония тезлик билан ҳаракатланмоқда. Довулдаги шамол тезлиги 38 м/сонияни ташкил қилмоқда.

Флорида губернатори 28 августда штат ҳудудида фавқулодда вазият тартибини киритган. Бу штатга Вашингтондан табиий офат оқибатларини бартараф этиш учун қўшимча маблағ ва захиралар сўрашга имкон беради. 

Атлантикада довуллар мавсуми одатда ярим йил – 1 июндан 30 ноябргача давом этади. Агар шамол тезлиги 17,5 м/сонияга етса, шторм ном олиб, тропик шторм сифатида, 33 м/сониядан ошса, довул сифатида таснифланади.