АҚШ президенти Дональд Трамп Кобулдаги терактдан кейин Афғонистон президенти Ашраф Ғани ва “Толибон” ҳаракати етакчилари билан 8 сентябрга белгиланган учрашувини бекор қилди ҳамда Афғонистондаги вазиятни тартибга солиш бўйича музокараларда иштирокдан воз кечди.
5 сентябрда Кобулнинг НАТО қароргоҳи, АҚШ элчихонаси ва ҳукумат бинолари жойлашган Шош Дарак туманида портлаш содир этилганди. Ҳужум оқибатида 12 киши, жумладан бир америкалик ва бир руминиялик ҳарбий ҳалок бўлган. Ушбу теракт учун жавобгарликни “Толибон” ўз зиммасига олган.
Трампнинг таъкидлашича, у Афғонистон президенти ва толиблар етакчилари билан ўзининг Кэмп-Дэвиддаги қароргоҳида учрашмоқчи бўлганди.
“Нима учун бунча кўп одам ўлдиришади – музокараларда ўз позицияларини мустаҳкамлаш учунми? Улар бунга эришмадилар, аксинча ўзларига ёмонроқ қилдилар. Улар бу муҳим музокаралар вақтида ўт очишни тўхтатишга келиша олмасалар ва ҳаттоки 12 нафар бегуноҳ одамни ўлдиришга борсалар, улар кўринишича каттароқ келишувга эришишга қодирмаслар. Улар яна неча ўн йиллаб жанг қилмоқчилар?”, деб айтган Трамп.
Қатарда АҚШ ва “Толибон” ўртасида ўтган охирги музокараларда келишув имзолангандан кейин АҚШ қўшинларининг Афғонистондаги 5 та базани 135 кун ичида тарк этишига келишиб олинганди.
