Тошкент вилоятининг учта туманида ер майдонлари янги лойиҳаларни амалга ошириш учун ажратилади

Вазирлар Маҳкамасининг “Тошкент вилоятининг Паркент, Бўстонлиқ ва Оҳангарон туманларида ғалла экишдан қисқартириладиган ер майдонларида мевачилик ва узумчилик, сабзавотчилик, картошкачилик йўналишидаги лойиҳаларни амалга ошириш чора-тадбирлари тўғрисида”ги қарори лойиҳаси эълон қилинди.

Ўзбекистон Республикаси Қишлоқ хўжалиги вазирлиги, “Давергеодезкадастр” қўмитаси ва Тошкент вилояти ҳокимлигининг ғалладан қисқартириладиган ер майдонларини тажриба-синов тариқасида мева-узумчилик, сабзавот-картошкачилик билан шуғулланиш мақсадида очиқ тендер танловлари орқали узоқ муддатли ижарага бериш ҳақидаги таклифи маъқулланиши мумкин.

Тошкент вилояти Паркент, Бўстонлиқ ва Оҳангарон туманларида ғалла экишдан қисқартириладиган ер майдонларини тажриба-синов тариқасида танлов асосида мева-узумчилик, сабзавот-картошкачилик йўналишидаги йирик лойиҳаларга ажратиш тартиби тўғрисидаги низом тасдиқланади.

Белгиланишича:

тендер танлови ва шартларида ернинг жойлашган манзили, майдони ва чегаралари (контурлар кесимида), ер фондидаги тоифаси, ҳолати, балл бонитети, сув тармоғи, экилиши лозим бўлган экин тури ва бошқа муҳим параметрлари тасдиқланади ва оммавий ахборот воситалари орқали эълон қилинади;

Академик М.Мирзаев номидаги боғдорчилик, узумчилик илмий-тадқиқот институти, Сабзавот, полиз экинлари ва картошкачилик илмий-тадқиқот институти билан ҳамкорликда ғалладан қисқартириладиган ер майдонларини ҳар бир ҳудудларининг тупроқ-иқлим шароитидан келиб чиқиб ихтисослаштириш, ушбу ерларга интенсив боғлар ва токзорлар барпо этиш, сабзавот, полиз ва картошка экинларини жойлаштириш бўйича тавсияларини ишлаб чиқади ҳамда улар тендер танловига тақдим этилади.

Мева-узумчилик, сабзавот-картошкачилик соҳасидаги лойиҳаларни танлови қуйидаги тамойилларга асосан ташкил этилади:

ахборотнинг очиқлиги ва эркинлиги;

ташаббускорларнинг тенг ҳуқуқлилиги;

ташаббускорлар томонидан мажбуриятларни бажарилиши.

Лойиҳалар танловини амалга ошириш учун ташаббускорларни жалб қилиш қуйидаги мақсадлар учун амалга оширилади:

халқаро стандартлар бўйича, шунингдек, ҳудудларнинг тупроқ иқлим шароитларидан келиб чиқиб, инновацион технологияларини қўллаган ҳолда мева, узум, сабзавот ва картошка етиштириш, йиғиб-териб олиш ва реализация қилиш, шунингдек, экспорт қилиш;

мева-узумчилик, сабзавот-картошкачилик соҳасидаги танловида юқори ҳосилдорликка, сифатга эга, зарарли организм ва касалликларга чидамли, юқори қўшилган қийматга эга рақобатбардош маҳсулотлар етиштириш тизимини яратиш;

ташаббускорнинг ўз маблағи ва тўғридан-тўғри хорижий инвестицияларни, шунингдек, тижорат банклари кредитларини жалб этиш ҳисобига мева, узум, сабзавот ва картошка етиштириш ва чуқур қайта ишлашни йўлга қўйиш.

Туман ер ресурслари ва давлат кадастри бўлими туман Қишлоқ хўжалиги бўлими билан биргаликда ғалладан қисқартириладиган бўш турган ёки захирага олинган ерларнинг рўйхатини шакллантиради, дастлабки лойиҳа йўналишини, қишлоқ хўжалиги массивларининг (ҳудудлар) ихтисослашувига эътибор берган ҳолда белгилаб, тасдиқлаш учун туман ҳокимига тақдим қилади.

Ҳар бир ер участкаси бўйича рўйхатга қуйидагилар илова қилинади:

ер участкасининг майдони (гектарда), ер участкасининг ер фондидаги ер тоифаси ва ер турлари кесимида маълумот, балл бонитети, сув билан таъминланиш даражаси, инфратузилма объектлари ҳақида қисқача маълумот;

ер участкасининг (М 1:10 000 миқёсдаги) қишлоқ хўжалиги харитасидан кўчирмаси, ер участкасининг чегаралари ва манзилларини кўрсатилган ҳолда жойлашиш режаси.

Туман ҳокими маълумотларни кўриб чиқади ва лойиҳа йўналишини тасдиқлаб, лойиҳа тузиш учун бир иш кун муддатда танлов ташкилотчисига юборади.

Танлов ташкилотчиси:

туман ҳокимлиги томонидан тақдим этилган лойиҳалар йўналишлари бўйича оммавий ахборот воситаларида танлов ўтказиш юзасидан эълон беради;

иштирокчилардан танлов таклифларини қабул қилади, уларнинг ҳисобини юритади, танлов комиссияси томонидан белгиланган тартибда хатжилд очилгунга қадар бутлигини, махфийлигини таъминлайди.

Қуйидагилар учун Комиссиянинг хулосаси асосида туман ҳокимининг қарорига асосан танлов ўтказилмасдан ер майдонлари ажратилади:

сабзавотчилик, картошкачилик, боғдорчилик-узумчилик лойиҳаларига қўшимча 10 минг АҚШ доллари эквиваленти миқдорида тўғридан-тўғри инвестиция киритадиган талабгорларга ва кластер корхоналарига маблағлар банкдаги ҳисобварағида кўринганидан сўнг, жорий йилда мақсадли ишлатиш шарти билан энг кам ўлчамлари 100 гектардан кам бўлмаган ҳажмда инвестиция мажбуриятлари асосида.

Бунда, мазкур талаблар асосида ер участкаси ажратилган ёки янгидан ташкил этилган қишлоқ хўжалиги корхоналари бизнес режасида кўрсатилган мажбуриятларини бажармаган тақдирда, ер ижара шартномаси туман ҳокими томонидан бир томонлама бекор қилиниши учун асос ҳисобланади.