Бу давлат мулкини бошқариш ва сотишнинг янги механизмларини белгилаб берувчи президент фармонида назарда тутилган.
Ҳужжатга кўра, ҳудудларда, шу жумладан олис жойларда жойлашган ва харидорлар учун жозибадор бўлмаган қишлоқ хўжалигига мўлжалланмаган ер участкалари учун янги механизм қўлланади.
Хусусан, бошланғич нархни босқичма-босқич пасайтириш механизми қўлланганидан кейин ҳам уч ойдан ортиқ вақт давомида сотилмаган ер участкаларига бўлган мулк ва ижара ҳуқуқини юридик шахсларнинг устав капиталига улуш сифатида киритишга рухсат берилади.
Бу очиқ электрон аукцион савдолари орқали ва тегишли лойиҳани амалга ошириш шарти билан амалга оширилади.
Бунда аукционда ҳатто битта талабгор қатнашган тақдирда ҳам ер участкасига бўлган ҳуқуқ унинг устав капиталига эълон қилинган нархда киритилиши мумкин. Натижада шаклланган улуш кейинчалик мазкур юридик шахснинг ўзига сотиб олиш учун таклиф қилинади.
Фармон билан давлат кўчмас мулкини хусусийлаштириш жараёни ҳам соддалаштирилмоқда. Давлат кўчмас мулк объектлари хусусийлаштирилганда, уларга бириктирилган ер участкаларига нисбатан сотувгача мавжуд бўлган ҳуқуқлар янги мулкдор учун сақлаб қолинади.
Бу умрбод эгалик қилиш, доимий фойдаланиш ва ижара ҳуқуқларига тааллуқли. Энг муҳими, бундай ҳолатларда ер участкалари бўйича ижара шартномаларини қайтадан тузиш талаб этилмайди.
Шунингдек, ер участкаларини «тайёр пакет» усулида аукционга чиқариш тизими йўлга қўйилади. Бунда ер участкаси ҳудудий архитектура-шаҳарсозлик кенгаши билан олдиндан келишилади ва қурилиш учун зарур бўлган барча рухсатнома ҳужжатлари расмийлаштирилади. Шундан кейингина у тайёр инвестиция таклифи сифатида савдога қўйилади.
Ушбу жараённи ташкил этиш учун маҳаллий ижро этувчи ҳокимият органлари ҳамда улар муассислигидаги инвестиция компаниялари масъул бўлади.
«Тайёр пакет»ни ишлаб чиқиш билан боғлиқ хизматлар харажатларини маҳаллий бюджет маблағлари ҳисобидан қоплашга рухсат берилади. Кейин ер участкаси аукционга чиқарилганда мазкур харажатлар унинг бошланғич нархига қўшилади.
Ер сотилганидан кейин «тайёр пакет»ни ишлаб чиқиш учун сарфланган маблағлар савдодан тушган маблағлар ҳисобидан қопланади.
Бундай ер участкалари, биринчи навбатда, мастер режалари ишлаб чиқилган ва тасдиқланган ҳудудлардан танлаб олинади.
