Ўзбекистон Фанлар академиясининг аъзоси, биофизик олим Бекжон Тошмуҳаммедов президент Шавкат Мирзиёев олиб бораётган сиёсат, фан ва хавфсизлик масалалари тўғрисида сўз юритди.
Бекжон Ойбекович Тошмуҳаммедов 1935 йил 27 январда Тошкент шаҳрида туғилган. 1958 йилда Москва давлат университетини тамомлаган. 36 ёшида докторлик диссертациясини ҳимоя қилган ва Тошкент давлат университетининг биология ва биофизика кафедраси профессори бўлган. 1975 йилда Берлиндаги Гумболдт университетида, 1978 йилда Мериленд университетида (АҚШ, Балтимор) илмий амалиёт ўтаган.
У ўз даврида Кембриж университетида (Буюк Британия) илмий фаолият билан шуғулланган. Япония Фанлар академиясининг Умумий физиология институтида таклиф этилган профессор сифатида ишлаган. 1985 йилда "Нейротоксинлар асаб импульслари генерациясининг молекуляр механизмларини ўрганиш воситаси сифатида" туркумидаги илмий ишлари учун СССР Давлат мукофоти лауреати бўлган.
Узоқ вақт Ўзбекистон Фанлар академиясининг биология бўлими мудири ва Фанлар академиясининг Физиология институти директори бўлиб ишлаган.
- Интервью беришга рози бўлганингиз учун ташаккур. Аввало, Ўзбекистондаги вазият, Ўзбекистон президенти бошчилигида амалга оширилаётган ислоҳотларни қандай баҳолашингиз тўғрисида сўрамоқчи эдим.
- Биз тез ўзгарувчан даврда яшаяпмиз ва менинг ёшимда барқарорлик кўпроқ хоҳланса-да, аммо бугунги кунда мамлакатимизда бўлаётган барча ўзгаришлардан жуда мамнунман. Ахир, йиллар давомида тўпланиб қолган муаммолар биринчи марта ўз ечимини топа бошлади.
Тўғри, ҳаммаси текис кетмаяпти. Президентнинг ўзи мавжуд камчиликларни тан олмоқда. Аммо энг муҳими, ҳукумат халқ билан мулоқот ўрнатди. Сўз эркинлиги ва диний эркинлик, инсон ҳуқуқлари энди жамиятимиз учун мўрт сўз эмас. Бугунги кунда одамларнинг манфаати шунчаки навбатчи сўзлар эмас - бу сиз ва бизнинг воқелигимиз.
Ва халқ ана шундай яшашга одатланмоқда ва бунинг аксини тасаввур ҳам қила олмайдилар. Биз узоқ, чуқур ва қўрқинчли уйқудан уйғонганимиз ойдинлашди.
Менимча, биз яқиндагина ҳукумат ўз оилаларини ташлаб, иш излаб кетган бечора муҳожирларни ҳақоратлашга йўл қўйганлигини унутиб юбордик. Биз Ўзбекистон ҳақидаги янгиликларни чет эл матбуотидан ўқиганимизни ёддан чиқардик. Атиги уч йил аввал БМТнинг судьялар ва адвокатлар мустақиллиги бўйича махсус маърузачиси Ўзбекистонда жонли эфирда матбуот анжумани ўтказишини тасаввур қилишнинг иложи йўқ эди.
Биз қисқа вақт ичида қандай йўлни босиб ўтганимизни осонгина унутдик. Бу муаммоларнинг ечимига, авваламбор, президент Шавкат Мирзиёевнинг қатъий сиёсий иродасини талаб этадиган саъй-ҳаракатлар орқали эришилади. Унинг ишончи ва танлаган йўлида қатъийлиги туфайли одамлар эркин гапириш ва фикрлаш имкониятига эга бўлдилар. Буларсиз бугун сиз билан бундай мавзуларда гаплашиб ўтирмаган бўлардик.
