Туғма ёки ҳаёт давомида олинган жароҳат, касаллик туфайли 16 ёшга етгунига қадар ногирон бўлиб қолган шахслар ─ болаликдан ногирон шахслар деб юритилади.

Болаликдан ногиронлик учун нафақани кимлар олиши мумкин?

Болаликдан ногирон шахсларга ногиронлик нафақаларини тайинлашнинг ҳуқуқий асоси – Вазирлар Маҳкамасининг 2011 йил
7 апрелдаги 107-сон қарори билан тасдиқланган «Болаликдан ногиронларга ва ўн саккиз ёшга тўлмаган ОИВ инфекциясига чалинган шахсларга нафақалар тайинлаш ва тўлаш тартиби тўғрисида»ги Низом ҳисобланади.

Ушбу низомга кўра, болаликдан ногиронлик учун нафақа тиббий-меҳнат эксперт комиссиялари (ТМЭК) томонидан болаликдан I гуруҳ ногиронлари, болаликдан II гуруҳ ногиронлари деб эътироф этилган 16 ёшдан катта шахслар, касалликнинг босқичидан қатъи назар, ўн саккиз ёшга тўлмаган ОИВ инфекциясига чалинган шахслар, шунингдек, нафақа олиш ҳуқуқини берадиган тиббий хулоса мавжуд бўлган тақдирда 16 ёшгача ногирон болаларга берилади.

Қандай ҳужжатлар талаб этилади?

Ногиронлик нафақаси Молия вазирлиги ҳузуридаги Бюджетдан ташқари пенсия жамғармаси томонидан ажратилади.

Ногиронлик нафақаси тайинланиши учун қуйидаги ҳужжатлар Пенсия жамғармасининг туман/шаҳар бўлимларига тақдим этилиши лозим:\

─ ногиронлик нафақасини тайинлаш тўғрисида ариза;

─ 16 ёшдан катта болаликдан ногирон томонидан – паспортининг нусхаси;

─16 ёшдан катта ОИВ инфекциясига чалинган шахс томонидан — паспортининг нусхаси ва соғлиқни сақлаш муассасалари томонидан белгиланган тартибда бериладиган тиббий хулоса;

─ муомалага лаётқатсиз деб эътироф этилган 16 ёшдан катта болаликдан ногироннинг ва ОИВ инфекциясига чалинган шахснинг ота-онаси, фарзандликка олувчиси, васийси ёки ҳомийси томонидан — муомалага лаёқатсиз деб эътироф этилган 16 ёшдан катта болаликдан ногироннинг ва 16 ёшдан катта ОИВ инфекциясига чалинган шахснинг паспорти нусхаси, ариза берган ота-она, фарзандликка олувчи, васий ёки ҳомийнинг паспорти нусхаси;