«Барселона»да барчаси жойида», - дея ишонч билан гапирмоқда каталонлар гранди раҳбари. «Барча Эрнесто Вальверденинг ишларидан ҳайратда, у ҳақиқий профессионал», — дея таъкидлайди «Барса» директори Гильермо Амор. 

Бир тарафдан қараганда, кўк-анорранглиларда барчаси ажойибдек: жамоа ички чемпионатда ва Чемпионлар лигасининг F гуруҳида етакчилик қилмоқда, сўнгги ўйинда «Сельта» таслим этилди, барча голлар клуб тарбияланувчилари томонидан урилди — Мессининг ҳет-триги ва Бускетснинг узоқ кутилган голи, у бу ўйинда «Барселона» сафидаги 550-ўйинини ўтказди. Аммо аслида клубда худди Каталония кўчаларида бўлаётгани каби «ёнғин» бошланган, «Сельта»нинг йирик ҳисобда тор-мор этилиши эса вабо вақтидаги сўнгги базмга ўхшайди. Жамоа инқирозга тушиб қолган, буни клуб раҳбариятидан бошқа тан олмоқда — халқаро экспертлар, футболчилар, мураббийлар ва мухлислар.

25 йилликдаги энг ёмон старт

Каталонияликлар Мессининг мавсум арафасидаги жароҳати жамоани кучсизлантиришини ҳисобга олишган, лекин бу ўта жиддий муаммо бўлмаслигига умид қилишганди. Амалда эса Леосиз кўк-анорранглилар 1994/95 йилги мавсумдан буён энг ёмон стартни қайд этишди, жамоа ЕЧЛ доирасида «Сигнал Идуна Парк»да кечган биринчи ўйинда мағлуб бўлишига бир бахя қолди, жамоа немислар майдонида жуда ожиз кўринди. «Биз янада яхшироқ ўйнашимиз мумкин, — дея ҳолатдан норозилигини ифодалади де Йонг. — Биз тўпни янаям тезроқ ҳаракатлантиришимиз ва тўпни йўқотганда кўпроқ прессинг қилишимиз керак».

Жамоадаги биринчи мавсумини ўтказаётган футболчи жамоа ўйинини шундай танқид қила олмоқдами, демак ишлар жойида эмас.

Жамоа фахрийси Пике эса ваҳима қилишга шошилмайди: «Биз Ла лигада ва Чемпионлар лигаси гуруҳида етакчимиз. Ўйинимизни ва натижаларни янада яхшилашимиз мумкин, аммо ишлар унчалик ҳам ёмон эмас».

Фикрларнинг бундай хилма-хиллиги кўпчиликда жамоада эски гвардиядагилар «ҳунар кўрсатаётгани» ва жамоа ривожланишига йўл қўймаётгани, Вальверде эса «кийим алмаштириш хонасидаги назоратни йўқотгани» ва шунчаки воқеалар ривожига аралашишни истамаётгани ҳақида тасаввурлар пайдо бўлмоқда. Пикенинг ўзи сўнгги 14 ўйинида 9 марта сариқ карточка олди — бу қоидабузарлик бўйича антирекорд ҳисобланади — у «Барселона»нинг ҳозирги ҳолатидан ташвишланмаяпти ва кўпроқ келажакдаги лойиҳалар ҳақида ўйлаётгандек. Шу кунларда Жерар клуб президенти бўлиши ва клубга Хави, Иньеста ҳамда Субисарретани қайтаришини маълум қилди, аммо майдонга аввалги Пикени ким қайтариши савол остида қолди. Месси майдонга қайтмагунича каталонлар чемпионат турнир жадвалида «ишонч билан» олтинчи ўринда боришди.