Таълим ташкилотлари, педагоглар ва ўқувчилар тўғрисида ягона маълумотлар базаси жорий этилади

Таълим ташкилотлари, педагог ходимлар, таълим олувчилар, таълим-тарбия жараёни ва бошқа зарур ахборотлар тўғрисида ягона маълумотлар базасидан иборат ахборот тизими жорий этилади.

Вазирлар Маҳкамасининг муҳокама учун эълон қилинган қарори лойиҳасида айтилишича:

2018-2021 йиллар учун ЮНЕСКО ва Ўзбекистон Республикаси ўртасидаги ўзаро ҳамкорлик бўйича меморандумда Олий таълим соҳасида малакани тан олиш бўйича Осиё – Тинч океани минтақавий конвенциясининг (Токио конвенцияси) Ўзбекистон Республикаси томонидан ратификация қилиниши юзасидан устувор мақсад белгиланган;

Токио конвенцияси чет давлатларда педагог ходимлар, тадқиқотчилар ва талабаларнинг чегаралараро мобиллиги масаласини сиёсий ва амалий жиҳатдан уйғунлаштириш имкониятларини яратишга қаратилган ҳужжат бўлиб, унга аъзо бўлишнинг асосий шартларидан бири аъзоликка даъвогар давлатда Миллий ахборот маркази (National information center) ташкил этилиши ҳисобланади.

Вазирлар Маҳкамаси ҳузуридаги Таълим сифатини назорат қилиш давлат инспекцияси, Олий ва ўрта махсус таълим вазирлиги, Халқ таълими вазирлиги ҳамда Мактабгача таълим вазирлигининг таълим ташкилотлари, педагог ходимлар, таълим олувчилар, таълим-тарбия жараёни ва бошқа зарур ахборотлар тўғрисида ягона маълумотлар базасини шакллантиришни ўз ичига олган таълим сифатини таъминловчи қуйидагилардан иборат “Узлуксиз таълим” ахборот тизимини жорий этиш тўғрисидаги таклифларига розилик берилиши мумкин:

а) Мактабгача таълим вазирлиги томонидан мактабгача таълим соҳаси фаолиятини мақбуллаштирган ҳолда автоматлаштиришни назарда тутадиган – “Мактабгача таълимни бошқариш ахборот тизими”;

б) Халқ таълими вазирлиги ҳамда тизимида тегишли таълим муассасалари бўлган вазирликлар ва идоралар томонидан умумий ўрта ва мактабдан ташқари таълим соҳаси фаолиятини мақбуллаштирган ҳолда автоматлаштиришни назарда тутадиган – “Умумий ўрта таълимни бошқариш ахборот тизими” ва “Мактабдан ташқари таълимни бошқариш ахборот тизими”;

в) Олий ва ўрта махсус таълим вазирлиги томонидан:

ўрта махсус таълим соҳаси фаолиятини мақбуллаштирган ҳолда автоматлаштиришни назарда тутадиган – “Ўрта махсус таълимни бошқариш ахборот тизими”;

тизимида бошланғич, ўрта ва ўрта махсус профессионал таълим муассасалари бўлган вазирликлар ва идоралар билан биргаликда касб-ҳунар мактаблари, коллежлар ва техникумлар фаолиятини мақбуллаштирган ҳолда автоматлаштиришни назарда тутадиган – “Бошланғич, ўрта ва ўрта махсус профессионал таълимни бошқариш ахборот тизими”;

тизимида олий таълим муассасалари бўлган вазирликлар ва идоралар билан биргаликда олий таълим муассасалари фаолиятини мақбуллаштирган ҳолда автоматлаштиришни назарда тутадиган – “Олий таълимни бошқариш ахборот тизими”;

г) Инновацион ривожланиш вазирлиги ва Вазирлар Маҳкамаси ҳузуридаги Олий аттестация комиссияси томонидан олий таълимдан кейинги таълим соҳаси фаолиятини мақбуллаштирган ҳолда автоматлаштиришни назарда тутадиган – “Олий таълимдан кейинги таълимни бошқариш ахборот тизими”;

д) тизимида таълим муассасалари бўлган вазирликлар ва идоралар томонидан малака ошириш ва қайта тайёрлаш таълим соҳаси фаолиятини мақбуллаштирган ҳолда автоматлаштиришни назарда тутадиган – “Малака ошириш ва қайта тайёрлаш бўйича таълимни бошқариш ахборот тизими”;

е) Давлат инспекцияси томонидан нодавлат таълим ташкилотлари фаолиятини мақбуллаштирган ҳолда автоматлаштиришни назарда тутадиган – “Нодавлат таълимни бошқариш ахборот тизими”.

Ахборот тизимини яратиш, жорий этиш ва келгусида юритишни мувофиқлаштириш мақсадида Ўзбекистон Республикаси Давлат бюджетидан молиялаштириладиган бошқарув ходимларининг умумий чекланган сони 15 нафардан иборат Давлат инспекциясининг “Узлуксиз таълим” миллий ахборот маркази ташкил этилади.

Қуйидагилар Марказнинг асосий вазифалари этиб белгиланади:

ахборот тизимига маълумот киритиш бўйича манфаатдор вазирликлар ва идоралар ҳамда уларнинг ҳудудий бўлинмалари билан ҳамкорлик қилиш, уларга тегишли маълумотлар базасига кириш ҳуқуқини таъминлаш;

ахборот тизимининг мунтазам тарзда онлайн ишлашини таъминлаш, маълумот киритилишининг тизимли мониторингини олиб бориш ҳамда маълумотларни алмашиш жараёнини мувофиқлаштириш;

ахборот тизимига киритилаётган маълумотларнинг махфийлигини таъминлаган ҳолда экспертизадан ўтказиш ва таҳлил қилиш;

ахборот тизимини ташкил этадиган маълумотлар базаларига ҳаққоний маълумотларнинг тўлиқ ва сифатли киритилишини таъминлаш, ҳисобга олиш ва статистикасини юритиш;

хорижий давлатларнинг, шу жумладан Токио конвенциясини ратификация қилган давлатларнинг миллий ахборот марказлари билан ҳамкорликни йўлга қўйиш ва ўзаро ахборот алмашишни таъминлаш;

ахборот тизимига киритилган маълумотларнинг чет тилларига таржима қилинишини ҳамда ахборот тизимига давлат тили билан бир вақтда киритиб борилишини ташкил этиш;

ахборот тизимини янада такомиллаштириш юзасидан таклифлар ишлаб чиқиш ва амалга ошириш;

тегишли вазирлик ва идораларда мавжуд бўлган ахборот тизимлари билан интеграциясини таъминлайдиган ахборот тизимини яратиш;

ахборот тизимининг ишлаш жараёнида юзага келган техник носозликларни тезкорлик билан бартараф этиш.

Белгилаб қўйилишича:

ахборот тизимини яратиш, жорий этиш ва юритилишини таъминлаш юзасидан буюртмачи ташкилот – Давлат инспекцияси, ахборот тизимини ишлаб чиқиш, ишга тушириш ва келгусида юритилишини таъминлаш бўйича пудратчи ташкилот – Марказ ҳисобланади;

Давлат инспекциясининг ахборот тизимини жорий этиш юзасидан ўз ваколатлари доирасида қабул қилган қарорлари давлат ва хўжалик бошқаруви органлари, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари учун мажбурий ҳисобланади;

Марказ давлат муассасаси шаклидаги юридик шахс ҳисобланади, ўз уставига, Ўзбекистон Республикаси Молия вазирлиги Ғазначилик бўлинмасидаги шахсий ғазна ҳисоб рақамига, Ўзбекистон Республикаси Давлат герби тасвири туширилган ва номи кўрсатилган муҳрга, ўз номи ёзилган штампга, бланкаларга эга бўлади;

Марказ ходимларига Давлат инспекциясининг тегишли лавозимлари учун белгиланган меҳнатга ҳақ тўлаш ва моддий рағбатлантириш шартлари қўлланилади;

ахборот тизимига маълумотлар киритилишида масъулиятсизликка йўл қўйган ёки нотўғри маълумотлар киритилишига сабабчи бўлган вазирликлар ва идораларнинг масъул ходимларига нисбатан Давлат инспекциясининг тақдимномасига мувофиқ интизомий жазо чоралари қўлланади;

ахборот тизимида 1992 йил 1 январдан бошлаб таълим ташкилотлари, педагог ходимлар, таълим олувчилар, таълим-тарбия жараёни ва бошқа зарур ахборотлар тўғрисидаги маълумотлар базаси яратилади.