Алишер Саъдуллаев: «Ёшлар билан қандай ишлаш кераклигининг намунасини кўрсатиб бермоқчимиз»

Ёшлар Иттифоқи Марказий кенгаши раиси Алишер Саъдуллаев чоршанба куни Халқаро пресс-клуб сессиясида чиқиш қилиб, ташкилот негизида янги давлат органи – Ёшлар ишлари агентлиги ташкил этилиши ҳақида гапириб ўтди.

«Муҳтарам президентимиз 27 декабрдаги ёшлар билан учрашувда айтдиларки, Ёшлар Иттифоқи – нодавлат-нотижорат ташкилот бўлса-да, жуда кўплаб давлат сиёсатини юргизувчи функцияларни бажарган. Бу бир вақтнинг ўзида ҳам масъулият юклаган, ҳам самарадорлиги юқори бўлмаган бўлиши мумкин.

Аслида ёшларга оид давлат сиёсатининг битта катта ўзгариши – давлат органининг пайдо бўлиши. Биз ўрганиб кўрдик, жуда кўп ривожланган давлатларда ёшларга оид давлат сиёсатини юритувчи орган бор ва унинг функцияси алоҳида, ҳаммадан ажралиб қолган ҳолда сиёсат юргизиш эмас. Умуман, ҳар горизонтал, ҳам вертикал равишда вазирликлар ва маҳаллик ҳокимликларга ёшлар билан ишлаш бўйича умумий куч сифатида қараш.

Агар биз ёшлар билан ишлаяпмиз, деб алоҳида бир ташкилот фақат ўзи ҳаракат қиладиган бўлса, аҳолининг 60 фоизини ташкил қиладиган ёшлар билан ишлаб бўлмайди. Буни жисмонан ҳам иложи йўқ. Шунинг учун ҳам асосий мақсад белгиландики, 2020 йилда бу ҳар битта органнинг сиёсатига айланиши керак. Унинг учин нима керак бўлади – ёшлар билан ишлаш тизими, методологик ёрдам ва қанақа ишланади деган саволга жавоб керак бўлади.

Агентликнинг ҳам вазифаси ҳам, умуман бу йилги вазифамиз ҳам биринчи ўринда ҳар бир ташкилотга ёшлар билан қандай ишланишининг намунасини кўрсатиб бериш ва ҳаммани бирдек ёшлар билан ишлаш масаласига жалб қилиш бўлади», – деган Саъдуллаевнинг сўзларини келтирмоқда Kun.uz мухбири.

Эслатиб ўтамиз, президент Шавкат Мирзиёев 27 декабрда ёшлар билан учрашиб, Алишер Саъдуллаевга бир ой муддатда Ёшлар иттифоқи негизида Ёшлар ишлари агентлигини ташкил этиш бўйича таклиф киритишга топшириқ берган эди.

Янги агентлик Президент администрацияси қошида тузилиши кутиляпти.