Молия вазирлиги техника воситаларини харид қилиш учун 5,4 млрд сўмни Ўзбекистон Миллий ахборот агентлигига ажратиши режалаштирилмоқда
![](https://storage.kun.uz/source/5/MqaJTYCabxajLl0qlmO-gYV8lyoE27tJ.jpg)
Ўзбекистон Миллий ахборот агентлигининг ахборот порталини яратиш тўғрисида ҳукумат ҳужжати лойиҳаси муҳокама учун жойлаштирилди.
Қайд этилишича, ҳужжат президентининг “Ўзбекистон Миллий ахборот агентлиги фаолиятини янада такомиллаштириш чора-тадбирлари тўғрисида” 2019 йил 2 декабрдаги ПҚ-4541-сон қарорининг 10-банди ижросини таъминлаш, шунингдек Ўзбекистон Миллий ахборот агентлигининг моддий-техника базасини такомиллаштириш мақсадида қабул қилиниши кўзда тутилган.
Лойиҳага кўра, Ўзбекистон Миллий ахборот агентлигининг ахборот порталини яратиш ва унинг моддий-техника базасини мустаҳкамлаш учун харид қилишини белгиланган техника воситалари рўйхати тасдиқланади.
Молия вазирлиги техника воситаларини харид қилиш учун Ўзбекистон Республикаси республика бюджетини 2020 йил 1-чорак якуни бўйича даромадлар режасини орттириб бажарилган қисми ҳисобидан 5,4 млрд сўмни Ўзбекистон Миллий ахборот агентлигига 2020 йилнинг апрель ойида ажратиши мўлжалланган.
Ўзбекистон Миллий ахборот агентлиги:
ҳужжат иловасида кўрсатилган техника воситаларини сотиб олиш учун қонун ҳужжатларида белгиланган тартибда тендер савдоларини ўтказади;
ўтказилган тендер савдолари якунлари бўйича иқтисод қилинган маблағни тегишли тартибда Ўзбекистон Республикаси республика бюджетига қайтарилишини таъминлайди.
Ажратилган бюджет маблағларидан:
мақсадли фойдаланиш юзасидан шахсий жавобгарлик Ўзбекистон Миллий ахборот агентлиги бош директори (А.Кўчимов)га;
давлат харидлари бўйича тендер (танлов) савдоларининг тўғри ўтказилиши устидан давлат молиявий назоратини амалга ошириш ҳамда мақсадли сарфланишини назорат қилиш Молия вазирлиги Давлат молиявий назорат департаменти зиммаларига юкланади.