Дастурда Алламжонов АОКАдан кетиши, миллий журналистика ва блогингдаги вазиятга оид саволларга жавоб қайтарди.
Унинг айтишича, Ахборот ва оммавий коммуникациялар агентлигидан кетиши «жамоанинг шахсий қарори» бўлган.
«Нега деганда, барибир эркин ишлаш иштиёқи тарозиси оғирлик қилди», дейди Комил Алламжонов.
«Тўғри, жуда кўпчилик савол берди: «Президент маслаҳатчисининг биринчи ўринбосари лавозимидан ҳеч ким ўз хоҳиши билан кетмаган, ҳеч қачон ундай бўлмайди. Одамлар бунга эриша олишмайди-ю, сизлар ариза ёзиб кетибсизлар?» деган гаплар ҳам бўлди.
Лекин қадриятлар биз учун бутунлай бошқа нарсада. Лавозим – бугун бор, эртага йўқ нарса. Олдимизга қўйган мақсадларимиз, эришмоқчи бўлган ютуқларимиз давлат иши билан боғлиқ бўлмаса, у ишдан кетган маъқул», – дея ўз истеъфосини тушунтирди АОКАнинг собиқ раҳбари.
Алламжонов давлат органидан кетгач, олдида қандайдир эшиклар ёпилиши мумкинлиги ҳақида саволга шундай жавоб берди:
«Фондимиз, журналист ва блогерлар овозининг жамланмаси учун қандайдир эшиклар ёпиладиган бўлса, биз қаттиқроқ тақиллатамиз, эшиклар ёпилса деразадан кириб борамиз. Олдимизга қўйилган мақсад, миссия ва вазифани сифатли бажариш учун курашамиз, ҳаракат қиламиз».
Алламжоновнинг «Улар» лойиҳасида янграган бошқа фикрлари:
«Майк Тайсон жаҳоннинг мутлақ чемпиони даражасига эришганидан кейин ҳам яна рингда кураш олиб боргани [ва енгилгани] менга жуда қаттиқ таъсир қилган. Шундан сўнг чемпионлик вақтида кетиш керак экан, деган фикрга келганман. Чиройли келиб, чиройли кетиш — бу жуда муҳим».
«Жамоатчилик фондимиз асосан журналистлар ва блогерларнинг ҳуқуқлари ва манфаатларини ҳимоя қилиш, уларни моддий ва маънавий рағбатлантириш, уларни ўқитиш, уларнинг касбий малакаларини ошириш, чет элларда малака оширишларини таъминлаш, вазирлик ва идоралар ахборот хизматларининг ОАВ билан ишлашини ўргатувчи курслар ташкил қилиш — умуман, ОАВ, журналистлар ва блогерларни қўллаб қувватлаш, сўз эркинлигининг таъминланишига кўмак бериш билан шуғулланади».
«АОКАда ишлаган давримизда туҳмат ёки ёлғон маълумотлар учун жиноий жавобгарликни енгиллаштириш масаласини раҳбариятга кўтариб чиқдик. Сўз учун, матбуотда айтилган гап учун журналист ёки блогер қамалиши керак эмас, деган ғояни кўтариб чиқдик ва президентимиз томонидан бу маъқулланди».
