Tashkent Pharma Park дирекциясининг асосий вазифалари белгиланади

Вазирлар Маҳкамасининг “Tashkent Pharma Park инновацион илмий-ишлаб чиқариш фармацевтика кластерини ривожлантириш Дирекцияси фаолиятини ташкил этиш тўғрисида”ги қарори лойиҳаси эълон қилинди.

Қайд этилишича, президентнинг Tashkent Pharma Park инновацион илмий-ишлаб чиқариш фармацевтика кластерини ташкил этиш тўғрисидаги қарори билан Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги ҳузуридаги давлат муассасаси шаклидаги Tashkent Pharma Park инновацион илмий-ишлаб чиқариш фармацевтика кластерини ривожлантириш дирекцияси ташкил этилган.

Қуйидагилар дирекциянинг асосий вазифалари ва фаолият йўналишлари этиб белгиланади:

кластер резиденти мақомини олиш учун юридик ва жисмоний шахслардан талабномаларни қабул қилишни ташкиллаштириш;

инвестиция лойиҳаларини танлаб олиш мезонларини ишлаб чиқиш, шунингдек ишлаб чиқариш майдончаларини жойлаштириш лотларини белгилаш;

кластер ҳудудида инновацион лойиҳаларни амалга ошириш тўғрисида инвесторлар билан инвестицион шартномаларни тузиш;

бошқа юридик шахсларнинг устав фонди (устав капитали)да иштирок этиш, қонунчиликда белгиланган тартибда ваколатхоналар ва филиаллар тузиш;

инновацион лойиҳаларни амалга ошириш чоғида резидентларда юзага келадиган ташкилий ва бошқа масалаларни ҳал қилишда кўмаклашиш чораларини кўриш, шунингдек кластер резидентлари ва қатнашчиларининг ёзма мурожаатларини қаноатлантириш бўйича тезкор тартибда амалий кўмаклашиш;

«ягона дарча» тамойили бўйича инвестицион лойиҳаларга ҳамроҳлик қилиш, унинг доирасида инвесторнинг вазирликлар ва идоралар билан ўзаро алоқасини мувофиқлаштириш, лойиҳани амалга оширишнинг барча босқичларида инвестор учун зарур ахборотларни тақдим этиш, зарур рухсат берувчи ҳужжатларни олишда кўмаклашиш, лойиҳани амалга ошириш учун зарур ахборот-маслаҳат хизматларини тақдим этиш ва унинг тўлиқ амалга оширилгунига қадар лойиҳага ҳамроҳлик қилиш;

кластер кўчмас мулкини оператив бошқарувга ва экспериментал-ишлаб чиқариш майдонлари, офис хоналари, конференц-заллари ва бошқа хоналар ва ҳудудларни ижарага ва субижарага кластер резидентлари, бошқа хўжалик субъектларига шартнома асосида тақдим этиш;

тендер, танлов савдолари, бошқа давлат харидларини ўтказиш ва энг яхши таклиф асосида хизматларга ҳақ тўлаш ва товарларни харид қилишни амалга ошириш;

 кластер резидентлари томонидан ўзларига олган мажбуриятларни лозим даражада бажарилиши устидан назоратни амалга ошириш;

инвесторлар ёки резидентлар томонидан ўзларига олинган мажбуриятлар бажарилмаган тақдирда улар билан кластер ҳудудида инновацион лойиҳаларнинг амалга оширилиши тўғрисидаги инвестицион шартномаларни бекор қилиш тўғрисида даъво аризалари билан судларга мурожаат қилиш;

халқаро молиявий институтлар, ҳамда тижорат банкларининг кредитларини жалб қилиш;

кластер резидентлари ўртасида самарали ўзаро алоқани ўрнатиш учун ягона рақамли платформани яратиш, олинаётган ахборотларни маҳаллий ва хорижий тадқиқот марказлари, халқаро фармацевтик компаниялар ва илмий марказларнинг келгуси таҳлили учун тайёр таҳлилий ва услубий маълумотларга тизимлаштириш;

платформа имкониятларидан фойдаланган ҳолда кластер резидентларининг рақамли платформасига интеграция қилиш бўйича хизматларни тақдим этиш ва келгуси хизматларни биргаликда кенгайтириш;

кластер фаолиятини оператив бошқарув бўйича бошқа вазифаларни амалга ошириш.

Дирекция даромадлари:

хизматлар кўрсатишдан тушган даромадлар;

кластер ҳудудида бўлган ва давлат мулки ҳисобланган бинолар ва иншоотларни ижарага беришдан тушган тушумлар;

инвестицион лойиҳаларда улушли иштирок этишдан тушган дивидендлар;

белгиланган тартибда доимий фойдаланишга кластер ҳудудида

ер участкаларини шартнома асосида тақдим этиш;

дирекция белгилайдиган миқдорларда кластер иштирокчиларининг ажратмалари;

қонунчилик билан тақиқланмаган бошқа тушумлар ҳисобига ҳосил бўлади.

Соғлиқни сақлаш вазирлиги, Олий ва ўрта махсус таълим вазирлиги, Вазирлар Маҳкамаси ҳузуридаги “Эл-юрт умиди” жамғармаси Фармацевтика техник университети ва кластер илмий ва илмий-педагогик кадрлар захирасини шакллантириш учун хорижий ўқув юртларида тайёрлаш ва малака ошириш учун фармацевтика ва бир-бирига яқин фанлар соҳасида олий ўқув юртлари, илмий муассасалар ва тиббий марказлар ёш олимлари, педагогик кадрлари ва мутахассисларини жалб қилишда кўмаклашади.

Дирекция вақтинчалик Тошкент шаҳри, Чингиз Айтматов кўчаси, 1А-уй, 100084 манзили бўйича ижара ҳақини ундирмасдан жойлаштирилади.