Путин ва Эрдўған 5 март куни Москвада музокара ўтказади

Аввалроқ Путин ва Эрдўған юзма-юз учрашишга келишиб олгани хабар қилинганди.

Фото: Sergei GuneevSputnik/Kremlin/Reuters

Россия президенти Владимир Путин 5 март куни Туркия президенти Ражаб Тоййиб Эрдўған билан музокара ўтказади. Бу ҳақда Россия раҳбарининг матбуот котиби Дмитрий Песков маълум қилди.

"Туркия Республикаси президенти 5 март куни Москвага ишчи ташриф билан келади. Унинг президентимиз билан музокара ўтказиши режалаштирилган", - деди Песков.

Аввалроқ Путин ва Эрдўған юзма-юз учрашишга келишиб олгани хабар қилинганди.

Суриянинг Идлиб провинциясида жиддий эскалация юзага келган: пайшанба куни кечқурунги ҳаво ҳужуми оқибатида Туркия армиясининг камида 33 нафар ҳарбий хизматчиси ҳалок бўлди. Туркия томони ҳаво зарбалари “Сурия режими” ҳарбий-ҳаво кучлари томонидан йўлланганини маълум қилган. Суриянинг бош иттифоқчиси Россия ҳужум нишонига тушиб қолган туркиялик ҳарбийлар «террорчилар орасида бўлгани»ни маълум қилган. Туркия буни инкор этган.

Тайёрлаган Дилшод Аскаров

#Россия #Туркия

2019 йил декабрида Сурия армияси Идлибни тўлиқ эгаллаш учун юриш бошлади. Туркия эса Сурия шимолидаги иттифоқчиларини ҳимоя қилиш учун бу ҳудуддаги кузатув постларига минглаб ҳарбийларини жўнатди ва икки томон ўртасида тўқнашувлар рўй бера бошлади.