Эрон парламентининг 20дан ортиқ депутати коронавирусга чалингани аниқланди

Эрон парламентининг 23 нафар депутати коронавирусга чалинган, деб хабар берди YJC портали спикер ёрдамчиси Абдулризо Месрига асосланиб.

Месри депутатларни аҳоли билан мулоқотни чеклашга чақирган. Шу билан бирга, парламент ўз ишини давом эттириши маълум қилинди.

Охирги маълумотларга кўра, Эронда 19 февралдан бери коронавирус юқтириш билан боғлиқ 2336та ҳолат қайд этилган, улардан 66таси ўлим билан тугаган, 291 киши соғайган. 

Эрон ҳукумати касаллик тарқалиши давом этишини тахмин қилмоқда. 

Сўнгги маълумотларга қараганда, Хитойда ушбу касалликка чалинганлар сони 80 минг кишидан ошган. Хитойдан ташқари яна 71 мамлакатда вирусдан зарарланиш ҳолати аниқланган. Жаҳон бўйлаб COVID-19 жами 90899 кишида қайд этган, вирус қурбонлари сони 3116 нафарни ташкил қилмоқда. Яна 48 мингдан ортиқ киши тузалиб кетган.