Англияда Манчестер дербиси, «Барселона»да яна қийин ўйин. Ҳафта ўйинлари анонси
|16:02 / 07.03.202021 17915 мин
Фото: Getty ImagesФото: Getty Images
Бу ҳафта балки уй юмушларидан вақтингиз бўлмаслиги ёки телевизор банд бўлиши эҳтимоли юқори бўлса-да, байрам кунларида футбол ҳам зериктирмаслигига кафолат бор. Манчестерда дерби, Италияда чемпионлик баҳси, Германия ва Испанияда эса, ЕЧЛ йўлланмасини учун муҳим ўйинлар бизни кутиб турибди. Италиялик икки буюк мураббий – Карло Анчелотти ва Антонио Конте ҳам ушбу турда собиқ жамоалари меҳмони бўлади.
Мадриднинг «Атлетико» жамоаси ҳар доим «Реал» ва «Барселона»га қаршилик қилишга уриниб кўрар, мабодо, бу амалга ошмаса ҳам, учинчи ўрин нақд, пастдан катта хавф сезмасди. Агар мавсум аввалги йиллардаги каби кечганида, «Атлетико» бу пайтга келиб ички чемпионатда «лайт» режимини ёқиб олиши ва бемалол, келаси ҳафта бўладиган «Энфилд»даги оғир учрашувга тайёргарлик кўриши мумкин эди. Айнан мана шу устунлик Симеоне жамоасининг еврокубокларда анча хавфли кўриниш олишини таъминларди. Лекин бу мавсум бошқача ўтмоқда.
Турнир жадвали, хусусан Чемпионлар Лигаси йўлланмаси учун курашда жуда катта аҳамият касб этадиган ўйин бизни кутиб турибди. «Севилья» 46 очко билан 3-ўринда бораётган бўлса, мана шу ўйиндаги мағлубият учларни тўртликдан пастга тушиб юбориши мумкин. «Атлетико» эса 5-ўринда бормоқда ва жамоа андалусияликлардан атиги 2 очко ортда боряпти, холос. Шунингдек, бу курашда «Реал Сосьедад», «Хетафе» ва «Валнесия» ҳам борлигини эътиборга олсак, Ла Лигада баҳор жуда қизиқ кечади, ишонаверинг.
Жамоаларнинг ўзаро ўйинларида, айниқса, сўнгги ўн йилликда «Атлетико»нинг устунлиги яққол, аммо қизиқ факт, Ла Лигадаги сўнгги уч ўйин бир хил – 1:1 ҳисобида тугаган экан. Қизиғи, учала ўйинда ҳам мезбон бўлган жамоа дастлаб ҳисобда олдинга чиқиб олган, кейин эса, меҳмонлар тенглаштиришган. «Севилья» сўнгги пайтларда жуда кўп дуранг ўйнаётгани, ҳатто Европа Лигасидаги баҳсларда ҳам, икки дуранг билан кейинги босқичга чиққанини эътиборга олсак, бундай ҳисобга Лопетеги шогирдлари қарши эмасдирлар. Ҳеч бўлмаса, бу ўйиндан кейин ҳам кучли тўртликдаги ўрин сақланиб қолади.
Таркиблар борасида ҳар икки жамоада ҳам сезиларли йўқотишлар йўқ. Поведа ва Лемар мезбонлардан, Фернандо ва Вацлик меҳмонлардан, жамоалар ўйинига сезиларли таъсир қиладиган футболчилар ҳисобланишмайди.
«Бавария» яна одатдагидек, баҳорий режимга ўтиб олди ва қаторасига ғалаба қозонишни бошлади. Сўнгги 10 ўйинда 9 ғалаба ва бир дуранг. Албатта, бу ҳолатда «Боруссия»ларга осон эмас, лекин Чемпионлар Лигаси йўлланмаси учун курашни ҳеч ким бекор қилгани йўқ. Ҳозирда жамоалар 46 ва 48 очко тўплаган ҳолда, 3-4 ўринларни эгаллаб туришибди, аммо пастдан «Байер» ҳам таъқиб этиб келаётганини эътиборга олиш керак. Тўрт жамоадан бири («Лейпциг» ҳам бор) якунда четга чиқади, табиийки, бу ўйиндаги мағлуб жамоа ўз имкониятларини анча пасайтириб юбориши турган гап.
Мавзуга оид
Дортмунд ҳам танаффусдан кейин ёмон кетмаяпти, янги йилдан кейин лигада фақат «Байер»га, кубокда эса «Вердер»га ютқазилди, холос. Айниқса, Эрлинг Ҳоланднинг келиши ҳужум чизиғини янада кучайтириб юборди. Таркиб ва имкониятлар борасида «Лейпциг» эмас, айнан «Боруссия» мюнхенликларга қаршилик қилишга қодир, деб ҳисобланмоқда.
Мезбонларда жароҳатлар бўйича муаммолар бор. Олдинги чизиқда анча фойдали бўлган Маркус Тюрамнинг бу ўйинда қатнашиши ҳамон сўроқ остида қолмоқда. Шунингдек, Иброҳим Траоре ва Денис Закария ҳам жамоага ёрдам бера олишмайди. Дортмундликлар сафида эса Марко Ройс бир ойга сафдан чиққанди. Ҳозир у тикланиб улгурган бўлса-да, ҳали жамоа билан шуғулланишни бошламади. Матс Ҳуммелснинг майдонга тушиши ҳам сўроқ остида. Бундан ташқари, келаси ҳафта Дортмундни Парижга оғир сафар кутиб турганини ҳам эътиборга олиш керак. Люсьен Фавр ўша ўйин учун ўз юлдузларини асрашга ҳаракат қилишиниям кутиш мумкин.
Жамоаларнинг биринчи даврадаги учрашувлари 1:0 ҳисобида мезбонлар фойдасига якунланган. Шунингдек, Германия кубогида ҳам бу икки клуб тўқнаш келиб, ўйин дортмундликларнинг 2:1 ҳисобидаги иродали ғалабаси билан тугаганди.
БАРСЕЛОНА – РЕАЛ СОСЬЕДАД (7 март, 22:30)
Икки жамоа ўйинни турлича кайфиятда ва босимда бошлашади, бу шубҳасиз. Сосьедадликлар куни кеча «Мирандес» майдонида кичик ғалабага эришиб, Испания кубоги финалига чиқди. Энди финалдаги басклар дербисида ғалаба қозонилса, «Сосьедад» 33 йиллик танаффусдан сўнг илк соврин соҳибига айланади. «Барселона» эса, аксинча, Мадриддаги мағлубиятдан сўнг, турнир жадвалидаги пешқадамликни бой бериб қўйди, ундан олдин ҳам Неаполдаги ўйинда жамоа у қадар ишончли кўринмаганди. Сетьен тайинланганига кўп вақт бўлмаган бўлса-да, унинг устида ҳам «қора булутлар» кеза бошлади. Ҳатто футболчиларнинг Кикега бўлган ишончсизлиги борасида хабарлар тарқалди. Нафақат мураббий, балки Бартомеу бошқаруви ҳам мухлисларни қаноатлантирмаяпти. «Барселона» 12 йилда биринчи марта мавсумни совринсиз якунлаши ҳам мумкин. Бу ҳолат 2007/08 мавсумида, яъни Гвардиола келмасидан олдин содир бўлганди.
Бундай вазиятда рақиб сифатида «Сосьедад»га рўбару келиш ҳам ноқулай. Ғалаба ҳеч нарсани исботламайди, зеро бу жамоага қарши охирги 9 ўйинда каталонияликлар мағлуб бўлмаган. Аммо ғалаба қозониш ҳам қийин, масалан, «Барселона» охирги беш ғалабасини қийинчилик билан, минимал ҳисобда қўлга киритган. Биринчи даврада Сосьедадда бўлиб ўтган ўйинда эса, 2:2 ҳисоби қайд этилганди.
Бундан ташқари, юқорида ҳам эсланганидек, «Реал Сосьедад»да турнир мотивацияси ҳам бор. Бакслар ЕЧЛ йўлланмасини қўлга киритиш йўлида ҳам фаол кураш олиб боришмоқда.
Жамоалар таркибида йўқотишлар йўқ. Фақат узоқ муддатга сафдан чиққан Дембеле ва Суаресга энди, Сержио Робертонинг жароҳати ҳам қўшилди. У ой охирида сафга қайтади. Меҳмонлар таркибида эса, Асьер Ильяраменди ва Диего Льоренте жароҳатдан фориғ бўлишса-да, тўлиқ спорт формасига кириб улгурмади, катта эҳтимол билан бу футболчилар келаси ҳафтадаги ўйинга тайёр бўлишади.
«Челси»нинг сўнгги пайтлардаги беқарор натижаларининг объектив сабаби ҳам бор. Лэмпард шогирдлари бир ой ичида «Лестер», «Манчестер Юнайтед», «Тоттенҳэм», «Бавария» ҳамда «Ливерпуль» билан ўйнашди - бундай тақвимдан омон чиқиш учун ўта тажрибали ва кучли жамоа бўлиш талаб этилади. Фақат ЕЧЛдаги имконият ёмонлашди, лекин Англия кубогида кейинги босқич ҳал қилинди, АПЛда ҳам «Челси» ҳамон тўртликда бормоқда. Айниқса, «Ливерпуль» устидан қозонилган ғалаба «Челси»нинг ўзига бўлган ишончини орттирган бўлиши табиий.
Ливерпулнинг бошқа жамоаси – «Эвертон» эса сўнгги пайтларда лондонликлар учун жуда ноқулай рақиб бўлиб келмоқда. Сўнгги икки ўйинда «Эвертон» ишончли ғалабага эришган бўлса, ундан олдинги икки ўйинда ҳисоб очилмаганди. Демак, «Челси»нинг «Эвертон»га қарши ғалабасиз серияси тўрт ўйинга етиб улгурди.
«Эвертон»да ҳам жуда қийин тақвим бошланган, «Арсенал» ва «Манчестер Юнайтед»га қарши ўйинлардан сўнг, энди «Челси». Кейин Ливерпуль дербиси кутмоқда. Бу учрашувларда «Эвертон» анча ишончли кўринмоқда, «Арсенал»га қарши ўйинда ҳам, «МЮ» билан ўйинда ҳам Анчелотти шогирдлари бир муддат ҳисобда олдинда боришди. «Челси» учун жуда жиддий синов бўлади, деб бемалол айтиш мумкин.
Бундан ташқари, «Челси»нинг таркибда жуда катта муаммолари бор. Кантедан ташқари, Ковачич ҳам жароҳатланган ва унинг бу ўйинда қатнашиш эҳтимоли кам. Виллиан ва Тимми Абраҳам ҳақида ҳам шундай дейиш мумкин. Ёш иқтидорли футболчи Каллум Ҳадсон-Одои бир ойлик танаффусдан сўнг, яна майдонга тушиши мумкин эди, аммо у машғулотлар вақтида жароҳатини янгилаб олди. Меҳмонлар сафида Люка Динь ва Морган Шнайдерлин жароҳатланишган. Шеймус Коулман «МЮ»га қарши ўйинни эрта тарк этди, у ҳам бу учрашувда майдонга туша олмаслиги ҳақиқатга яқинроқ.
Дарвоқе, Карло Анчелоттининг Англиядаги аввалги жамоаси «Челси» бўлганини ҳам эсласангиз керак. «Кўклар» италиялик мутахассис қўл остида 2009/10 йилги мавсумда АПЛ ғолиблигини ҳам қўлга киритганди.
Манчестернинг икки клуби ҳам яхши кайфиятда. Пеп Гвардиола шогирдлари барча мусобақаларда қаторасига беш ўйинда ғалаба қозонишди. Бу ютуқлар «Сити»га Англия Лига кубогини, Англия кубоги чорак финалини ва шунингдек, ЕЧЛда «Реал»га қарши жавоб ўйини олдидан устунликни тақдим этди.
Сульшер эса, шогирдларини январь-февралда яхши ўйнатадиган «жин» экан. Рэшфорд, Погба, Мактомини каби муҳим футболчиларнинг йўқотилиши, гўёки, жамоани оғир аҳволдан чиқиб кетмайдигандек тасаввур уйғотганди, аммо кўриб турганимиздек, «Юнайтед» 9 ўйиндан бери мағлубият нималигини билмай келмоқда. Шу билан бирга, жамоа ўйинига барқарорлик кириб келди. Биринчидан, «МЮ» ўрганиб қолганимиздек, чуқур ҳимояни ёриб ўтишдаги муаммоларни ечган кўринади, зеро 2020 йилнинг ўзида жамоа ҳисобида 4:0, 3:0, 6:0, 5:0, 3:0 ҳисобидаги ғалабалар бор. Албатта, бу майдон марказида креатив футболчи Бруно Фернандешнинг тўп сура бошлагани билан ҳам боғлиқ.
Иккинчидан эса, ҳимояда ҳам ишончли ўйин кузатиляпти – «МЮ» янги йилда 10 ўйинда ўз дарвозасини дахлсиз сақлашнинг уддасидан чиқди. Бу ҳозир кучли бешликдаги энг яхши кўрсаткичдир. 2019 йилнинг 4 ойида «Юнайтед» жами бўлиб 9 ўйинда ўз дарвозасидан гол ўтказмаганди, холос.
Манчестер дербиларида кузатилаётган яна бир қизиқ жиҳат, сўнгги беш йилда меҳмонлар яхшироқ натижага эришмоқда. «Этиҳад»да бу даврда «МЮ» 4 марта ғалаба қозонди ва 1 дуранг ўйнади, атиги бир марта мағлубиятга учради, холос. «Олд Траффорд»да эса, аксинча, сўнгги беш ўйиндан тўрттасида «Манчестер Сити» ғалаба қозонган. Ҳатто яқинда Лига кубогидаги тўқнашувда ҳам ҳаммаси тескари бўлди – «Этиҳад»да ҳам, «Олд Траффорд»да ҳам меҳмонларнинг қўли баланд келди.
Навбатдаги дербига Поль Погба тайёр бўлиши ҳақида хабарлар чиққанди, аммо Сульшернинг матбуот анжуманида айтишича, бунга ҳали эрта. Шунингдек, Даниел Жеймснинг майдонга тушиши ҳам сўроқ остида. Антони Марсиялда кичик жароҳат бор эди, лекин у «Дерби»га қарши ўйинда ҳам қисқа муддатга майдонга туширилди. Демак, катта эҳтимол билан у дербида ҳам сафда бўлади. Меҳмонларда эса энг катта йўқотиш – Кевин Де Брюйне ўйнай олмаслиги ҳақида хабарлар бор. Унинг ҳолати бироз мавҳум бўлса, Эмерик Ляпорт яна бир ой шерикларига ёрдам бера олмайди. Яхши гаплардан эса, Лерой Сане умумий тартибда машғулотларда қатнашяпти ва балки, захирадан бўлса ҳам, мавсумдаги илк ўйинида қатнашиши мумкин.
Жамоаларнинг спорт формаси ҳақида айтсак, «қизиллар» Англия кубогидаги учрашувларини пайшанба оқшомида, «Манчестер Сити» эса, чоршанба куни ўтказди. Шу нуқтайи назардан мезбонларда жисмоний тарафдан бироз муаммо бўлиши мумкин.
ЮВЕНТУС – ИНТЕР (9 мартга ўтар кечаси, 00:45)
Бу ўйин аслида икки тур олдин бўлиши керак эди, лекин коронавирус хавфи туфайли, кейинроққа сурилганди. Худди шу сабаб билан, Италияда навбатдаги тур ўйинларининг ҳам аксарияти қолдирилди, жумладан, «Ювентус» Болоньяга сафар қилиши, «Интер» «Сассуоло»ни қабул қилиши керак эди. Бу ўйинлар бошқа кунга кўчирилди. Пайтдан фойдаланиб, «Ювентус» ва «Интер» ўртасидаги тўқнашув якшанба оқшомига белгиланди.
«Лацио»нинг ўйини ҳам бу турда ўтказилмаслигини эътиборга олсак, «Интер» устидан ғалаба «Ювентус»ни яна турнир жадвали пешқадамига айлантиради. Шу билан бирга, Конте жамоаси ҳам улкан босим борлигини таъкидлаш керак. Сабаби, ҳозирда жамоаларни 6 очко ажратиб турибди (миланликларда 1 ўйин кам) ва агар Туринда мағлубиятга учрайдиган бўлса, «Интер» пешқадамдан 9 очкога қолиб кетади. Мавсум якунига яқинлашганда бундай фарқ юзага келиши, амалда жамоани чемпионлик курашидан чиқариб юбориши ҳам турган гап.
Сўнгги йилларда «Интер» аста-секин кучайиб, камида Чемпионлар Лигаси ўринларини олиб келаётган бўлса-да, ўзаро ўйинларда туринликлар яққол устунликка эгалар. Хусусан, сўнгги ўн йилда А Серия доирасидаги ўйинларда «Интер» атиги икки марта ғолиб чиққан, холос. Охирги ғалаба ҳам 2016 йилнинг сентябрига тўғри келади. Биринчи даврадаги ўйинда эса, «Ювентус» Игуаиннинг учрашув охирларидаги голи эвазига 2:1 ҳисобида ғалаба қозонганди.
Ва табиийки, Антонио Контенинг рақиб мураббийи сифатида Туринга ташриф буюриши катта воқеа бўлади. «Ювентус»нинг Италияда шу даражага келишида ва Европада ҳам рақобатбардош ҳолатига қайтишида айнан Антонио Контенинг улуши катта.
