Тошкентдан қайтадиган 80 минг ўқувчи-талаба, ишлашда давом этадиган ўқитувчилар ва қимматлаган таксилар – Ином Мажидов билан суҳбат
|16:47 / 17.03.202041 6329 мин
Ўзбекистонда коронавирус тарқалишининг олдини олиш мақсадида таълим муассасаларининг карантинга ёпилиши ортидан Тошкент шаҳрида ўқиётган талабалар доимий яшаш жойларига юборилмоқда.
Таътил ҳозирча икки ҳафта давом этиши белгиланган.
Талабаларни карантин таътилига юбориш – камдан-кам кузатиладиган ҳолат. Хўш, Олий ва ўрта махсус таълим вазирлиги бундай тадбирларга қай даражада тайёр? Ўқувчи-талабалар учун қандай имкониятлар тайёрланди? Таътил муддати узайтирилиши борасидаги гаплар асосга эгами? Вилоятларга қатновчилар таксиларда нархнинг сунъий оширилишига қарши қандай чоралар кўрилади?
Kun.uz мухбири шу ва бошқа мавзулар бўйича Олий ва ўрта махсус таълим вазири Ином Мажидов билан суҳбатлашди.
«Талабаларни карантин доирасида вилоятларга юбориш ёзги ва қишки таътил шаклида ташкил қилинади»
Ўқувчи ва талабаларни таътилга юбориш ишлари қандай ташкил қилинмоқда ва бу жараёнда қайси жиҳатларга алоҳида эътибор қаратилади? Вазир Мажидовдан дастлаб шу ҳақда сўрадик.
«Олий ва ўрта махсус таълим муассасаларининг ўқувчи ва талабаларини таътилга чиқариш ишларини бошладик.
Айтганингиздек, кеча Бош вазир томонидан ўтказилган алоҳида йиғилишда бу ҳақда топшириқ берилди. Таътилга барча ўқувчи ва талабалар юборилади. Бунда таълим шаклига кўра, ҳам кундузги, ҳам кечки ўқийдиганларнинг дарс ва табиийки, имтиҳон жараёнлари ҳам сурилади.
Бугун эрталабдан олий ўқув юртлари талабалари ташкиллаштирилган ҳолда вилоятда яшайдиганлари вилоятларга чиқа бошлашди. Бугундан барча дарс машғулотлари тўхтатилган», – деди вазир.
Мажидовга кўра, бугунги кунда таълимнинг барча шакллари бўйича (академик лицей, коллеж, олий таълим муассасалари – таҳр) Тошкент шаҳрида вилоятлар ва Қорақалпоғистон Республикасидан келган 80 мингга яқин ўқувчи-талаба таҳсил олади.
«Бу қандай ташкил қилинади, дедингиз. Бу худдики ёзги ва қишки таътил шаклида ташкил қилинади. Бу жараёнда асосан 3 кун ичида талабаларнинг катта массаси чиқиб кетиши режа қилинмоқда. Масалан, 15 мартнинг ўзида «Талабалар шаҳарчаси»ни 900га яқин талаба тарк этди. Бизда бунинг ташкилий формалари бор.
Тошкентдаги «Талабалар шаҳарчаси»да 8 мингга яқин талаба истиқомат қилади. Биз улар учун алоҳида кассалар ташкил қиляпмиз.
Мавзуга оид
Талабаларнинг чиқиб кетиши учун 4 хил транспорт воситалари тайёрланган. Талабаларга эса бу транспорт воситалари учун чипталарга чегирмалар берилади. Бугун эрталабдан чипталар сотилиши бошланди.
Бундан ташқари, Тошкент ирригация институти, Тошкент давлат педагогика университети ҳамда Ўзбекистон давлат жаҳон тиллари университетида қўшимча кассалар ташкил қилинмоқда», – деди Мажидов.
«Карантин муддати сифатида 2-3 ҳафта ёки узоғи билан 1 ойни мўлжал қилмоқдамиз»
Тасаввур қилайлик, карантин вақти чўзилиб кетди. Хўш, ана шундай ҳолатда таътил муддати қанчагача узайтирилиши мумкин?
Мажидовнинг айтишича, вазирлик карантин муддати сифатида 2-3 ҳафта ёки узоғи билан 1 ойни мўлжал қилмоқда.
«Барибир яхши ният қилишимиз керак. Бу унчалик кенг тарқалиши керак эмас. Бу, албатта, одамларни тинчлантириб, жиддийлик даражасини камайтириш дегани эмас. Бу – жуда жиддий масала. Шундан келиб чиқиб бизга ҳозирча 2 ҳафта муддат айтилди», – дейди суҳбатдошимиз.
Вазирга кўра, бу таътил қолган таътилларга қўшимча сифатида берилаётгани йўқ. Яъни, дастур бўйича унинг муддати қанча бўлишидан қатъи назар ёзги таътил ҳисобидан бўлади.
«Бизда ёзги таътилга чиқиш июнь ойининг ўрталаридан бошланиб, учинчи ойининг ўрталарида тугайди. Таътил мана шу кунлар ҳисобидан бўлади. Яъни, тасаввур қилинг ўша пайтдаги бир ойлик таътил ҳозирги вақтга кўчирилди», – деди у.
Маълум қилинишича, вазирлик томонидан талабаларни масофавий таълим шаклида ўқитиш бўйича тайёргарлик ҳам қилиб қўйилган. Яъни, биринчи навбатда сиртқи ва малака оширишдаги таълим ҳеч қандай талафотсиз 1-2 кун ичида масофавий таълим шаклига ўтказиб юборилади.
Бу борада вазирнинг ўзи қуйидагича фикр билдирди: «Чунки бизда дастурий платформалар бор. Бу эса ҳатто маълум йўналишларда ишлатиб келинаётган эди. Методик ишларнинг ташкилий жиҳатларини келишиб олдик. Ҳозир кафедраларда иш давом этади».
«Талабалар таътилга чиқди, аммо ўқитувчиларга иш жараёни давом этади»
Карантин тадбирлари доирасида барча таълим муассасаларида ўқиш жараёнларининг бекор бўлиши, шунингдек, оммавий тадбирларнинг тўхтатилиши ортидан сайтимизга ўқитувчилардан кўплаб мурожаатлар етиб келди.
Унга кўра, ўқитувчиларда карантин сабаб ўқишлар тўхтатилган бўлса-да, иш жараёнлари давом эттирилаётгани борасида турли саволлар юзага келмоқда. «Биз дарс бермасак, ишга бориб нима қиламиз, ахир ишимиз дарс бериш бўлса», демоқда улар.
Вазир Ином Мажидов бу ҳақда шундай дейди:
«ОТМ ўқитувчиси ҳақида гапирадиган бўлсак, унинг кафедрада қиладиган иши жудаям кўп. Биринчидан, ўзи одатда апрел ойидан бошлаб ўқитувчи кейинги ўқув йили учун материалларини тайёрлаши керак. Шунинг учун апрель ойларидан олий ўқув юрти кейинги ўқув йилини режалаштиришни бошлайди.
Бунда кейинги ўқув йилида қайси ўқитувчининг қайси фанлардан дарс беришини аниқлаш бошланади. Бу аниқ бўлгач, ўқитувчи унинг дастурини ишлаб чиқиши керак. Бундан ташқари, ишчи ўқув дастури, ўзи дарс берадиган фани бўйича материалларни тўплаши керак.
Олий таълимда бир хил материални ҳар йили бериб бўлмайди».
– Фикрларингиз тушунарли, лекин бу мантиқ билан ёндашсак талаба томонидан ўзлаштириладиган билимлар, мавзулар жуда кўп. Мен барча таълим муассасалари карантинга олинаётган бир пайтда нега ўқитувчиларни сақлаб қолаётганларингиз ҳақида гапиряпман. Уларни эҳтиёт қилиш керак эмасми?
Вазир бу саволга жавобан ОТМлар ёпилгани билан иш жараёни тўхтамаслигини айтди.
«Биз тўлиқ карантин қилдик, ҳамма жой ёпиқ деганимиз йўқ. Биз фақат талабаларни таътилга чиқардик. Агар профессор, ўқитувчилар қайси бири таътилга чиқмоқчи бўлса, бунгаям қаршилик бўлмайди.
Бу масала кечаги йиғилишда ҳам гапирилди. Биласиз, бугундан мактабгача таълим муассасалари ва мактаблар ҳам ёпилди. Агар қайсидир ўқитувчи фарзандларига қарамоқчи бўлса, уларга рухсат берилади.
Биз ҳозир ўйлаяпмизки, агар ўқитувчи ҳозир таътилга чиқса ва ўқиш жараёнлари 3 ҳафтадан кейин бошланса, ўқитувчи яна ишга чақирилади. Қолган қисми эса ёзда ўталаверади», деди Ином Мажидов.
Талабалар орасида енгил автомобил орқали кўча таксиларида уйига кетадиганлар кўп. Афсуски, талабалар йўлга чиқишини эшитган кўпчилик такси ҳайдовчилари хизмат нархини одатдагидан бир неча баробар ошириб юборган ҳолатлар ҳам учраяпти.
Бу ҳолат ҳукумат томонидан қанчалик ўйланган ва нафсини ўйлаган бу каби ҳайдовчиларга қандай чоралар кўрилади?
Олий ва ўрта махсус таълим вазири билан деярли ҳар таътил мавсумида такрорланадиган ушбу ҳолат юзасидан ҳам фикрлашдик.
У 15 март куни Абдулла Арипов бошчилигида ўтган йиғилишда ҳам бу ҳақда сўз борганини маълум қилди.
«Бундай ҳайдовчилар қонун олдида жавоб беради. Бизда қонунчилик бор ва унинг олдидаги жавобгарликни ҳамма сезиши керак. Бундай номақбул ишлар учун албатта жазо бор, лекин ундан ташқари, йўлларда доимий қатнайдиган таксилар бор. Аммо мана шундай вазиятдан пул топиш учун фойдаланадиганлар ҳам бор.
Мен лицензия масалаларини билмайман, лекин ўйлайманки, Ички ишлар органларининг Йўл ҳаракати хавфсизлиги органлари буни назорат қилади. Мана шу кунларда назорат кучайтирилса, яна ҳам яхши бўларди.
Сиз юқорида бир масалани айтдингиз – миллат жипслиги. Биринчидан, тартиб бўлиши учун тартибни назорат қилувчи органларнинг етарли даражада кучи бўлиши керак.
Бундан ҳам муҳим масала эса миллатнинг жипслиги. Бундай пайтда кишиларимиз миллат, халқ, ватан ва фарзандлар учун масъулиятни сезиши керак.
Одамлар шу давлат, халқ ва миллатга мансублигини сезиши керак. Инсоф бўлиши керак кишида. Ҳеч ким айтолмайдики, бугунги 6 зарарланиш ҳолатида еттинчи киши ким бўлишини.
Мен ҳайдовчиларимизга мурожаат қилган бўлардимки, мана шундай оғир кунларда халқимизга хизмат қилаётганлар аввал қандай нархда ишлаган бўлса, шундай хизмат қилсин», деди Иномжон Мажидов.
Суҳбатни тўлиқ шаклда юқоридаги видео орқали томша қилишингиз мумкин.
