«Энг катта орзум ушалди» – Москвада бўёқчилик қилган сирдарёлик аёл ҳикояси (якуний қисм)

Kun.uz ижодий гуруҳи Россияга сафари давомида Москвада бўёқчилик қилиб, тирикчилик кўйида юрган сирдаёлик Дилором Маҳамматова билан суҳбатлашган эди.

Кўрсатув эълон қилингач, қаҳрамонимиз яхши инсонларнинг кўмаги билан оиласи бағрига қайтди.

Яқинда Дилором опанинг ўша интервьюда айтиб ўтган орзуси ушалди – тўй қилиб, ўғлини уйлантирди.

Дилором Маҳамматова билан Москвада суҳбатлашганимизда қийинчиликларга сабр қилиб, ҳалол ризқ топиб, фарзандларини ўқитаётган бу ўзбек аёлининг шижоатига ҳавас қилган эдик. Ўшанда кўзларига ёш олиб, энг катта орзуси – ўғлини уйлантириш ва бу меҳрибонлик уйидан суннат қилинмаган болаларни олиб келиб, ўғлининг тўйига қўшиб тўй қилиб бериш эканини айтиб ўтган эди.

Куни кеча ўғлини уйлантирган Дилором Маҳамматова Меҳрибонлик уйидан кўнгли ярим болажонни олиб келиб, ўғлининг тўйига қўшиб суннат тўйи қилиб берди.

Бугун Дилором Маҳамматова – бахтли қайноналардан. Биз эса хулоса ўрнида таъкидлашни истардикки, қийинчиликларга сабр қилган инсон албатта мақсадларига эришади. Инсон меҳнатдан қочмаслиги, машаққатларга сабр қилиб, яхши ниятлар билан яшаши керак.