Миллиардер Тиньков «Тинькофф Банк» директорлар кенгаши раиси лавозимидан кетади

Миллиардер Олег Тиньков яқин ҳафталар ичида “Тинькофф Банк” директорлар кенгаши раиси лавозимидан кетади. Миллиардернинг бу ҳақидаги баёнотини унинг вакили Forbes нашрига берган.

Фото: ТАСС

Тиньковнинг маълум қилишича, у бизнесдаги улушини назорати остидаги компаниялардан оилавий трастга ўтказган. “Бу акцияларни ҳар қандай вазиятда, ҳатто менинг ўлимим ҳолатида оилада сақлаб қолиш имконини беради”, деб тушунтирган миллиардер.

Тиньковнинг истеъфоси унга “бор эътиборини соғлиғига қаратиш” имконини беради. Унинг таъкидлашича, соғлиқ ҳозир у учун “устувор масала” ҳисобланади.

Март бошида миллиардер унда лейкемиянинг (оққон) ўткир шакли аниқланганини маълум қилганди. “Мен бир нечта кимётерапия курсларидан ўтдим. Ҳаётимда ўзим ва ишим учун курашишга тўғри келган, бироқ ҳозир мен энг асосийси - ҳаётим учун курашаман”, деб таъкидлаб ўтган Тиньков.

“Тинькофф Банк” тижорат банки бўлиб, унинг фаолияти тўлиқ масофадан хизмат кўрсатишга ихтисослашган.

Тиньков “Тинькофф Банк”га эгалик қилувчи TCSGroup компанияси капиталида 40,4 фоиз улушга эга бўлган. Унинг овоз беришдаги улуши 88,6 фоизни ташкил қилган.

Тиньков Forbes талқинига кўра, россиялик миллиардерлар орасида 2,2 млрд долларлик бойлик билан 47-ўринни эгаллаб келмоқда.