Покистондан 22 нафар ўзбекистонлик Тошкентга қайтарилди

Душанба, 6 апрель куни Ўзбекистондаги 128 нафар покистонлик Покистон халқаро авиакомпаниясининг махсус парвози билан мамлакатга қайтарилди.

Фото: radio.gov.pk

Элчихона тарқатган пресс-релизга таяниб AAJTVнинг хабар беришича, гуманитар ишора сифатида худди шу рейс орқали 22 нафар Ўзбекистон фуқаролари Покистондан қайтарилган.

«Ушбу покистонлик фуқаролар орасида Ўзбекистон Республикасига қисқа муддатли визалар билан келган ва COVID-19 авж олганидан кейин халқаро рейсларнинг тўхтатилиши сабабли Покистонга қайтиб кела олмаган сайёҳлар киради» , - дея маълумот берилади хабарда.

Покистоннинг Тошкентдаги элчихонаси ўз фуқароларининг Ўзбекистонда бўлиш билан боғлиқ барча шароитларни яратиб берган ҳамда эвакуация ишларини ташкил этишда фаол иштирок этган.