Исломободдаги давлат касалхонасида содир бўлган ёнғин камида 14 чақалоқнинг ўлими билан якунланди. Қурбонларнинг яқинлари бинодаги хавфсизлик чораларини савол остига олмоқда.
26 август тонгида Покистондаги шифохонанинг туғруқ бўлимида келиб чиққан ёнғин оқибатида камида 14 нафар янги туғилган чақалоқ ҳалок бўлди. Расмийларга кўра, ёнғин кондиционер блокида бошланган. Палатадаги чақалоқлар эса ё инкубаторларда бўлган, ёки кислород ускуналарига уланган бўлган.
Ушбу фожиа Исломободдаги давлат касалхонасининг хавфсизлик чоралари бўйича бир қанча саволларни келтириб чиқармоқда.
Хусусан, ўз исмини ошкор қилмаган – қурбонлардан бирининг отаси Reutersʼга палатанинг аҳволи ёмонлигини билдирган:
«Мен саккиз кундан бери у ерга қатнаётгандим. У бинода ёнғин хавфсизлиги таъминланмаган, тегишли чиқиш йўллари ҳам йўқ эди. Барча эшиклар ёпиқ эди, болаларимизни кўришимиз учун фақат битта эшик очиб қўйилган. Улар болаларимизни жуда тез-тез кўришга келамиз, деб хавотирланиб, бошқа эшикларни қулфлаб қўйишган эди», дейди ота.
Касалхонанинг ижрочи директори эса BBC нашрига туғруқ бўлимининг эшиги қулфланмаганини, бироқ чақалоқларни ўғирлаб кетиш эҳтимолидан ҳимоя қилиш учун унга қўриқчи қўйилганини билдирди.
Касалхонадаги тартибсиз ва даҳшатли манзараларни тасвирлаган баъзи гувоҳлар қутқарувчиларнинг жавоб ҳаракатлари секин бўлганидан шикоят қилишмоқда.
Улардан бири Хуррам Маҳмуд AFP ахборот агентлигига ёнғинда уч кунлик қизидан айрилганини айтди ва қутқарувчиларнинг етиб келиши учун соатлар кетганини таъкидлади: «Биз йўл бўйида ёрдам кутиб ўтирган эдик».
Яна бир гувоҳ эса ёнғин «жуда тез» тарқалиб кетганини айтди. У беморларни қутқаришга ёрдам бериш мақсадида касалхонага киргани, бироқ туғруқ бўлимига етиб бора олмаганини таъкидлади:
