Ўзбекистонда янги ахборот тизими яратилади. У маълумотларни йиғиш ва қайта ишлашга алоқадор

“Маълумотларни бошқариш” ахборот тизимининг самарали фаолият юритишида давлат органлари ва ташкилотлари ҳамда маҳаллий ижро этувчи ҳокимият органларининг асосий вазифалари этиб қуйидагилар белгиланади:

а) Иқтисодий тараққиёт вазирлиги:

“Маълумотларни бошқариш” ахборот тизимини яратиш ва жорий этиш ҳамда такомиллаштириш, шунингдек, унга эгалик қилиш ва унинг узлуксиз фаолият кўрсатишини таъминлаш;

ахборот тизимида иштирок этувчи давлат органлари ва ташкилотлари, жамланадиган ҳамда таҳлил этиладиган маълумотлар рўйхати ва уларни тақдим этиш даврийлигини белгилаш;

Прогнозлаштириш ва макроиқтисодий тадқиқотлар институти билан биргаликда:

ахборот тизимидаги маълумотларидан фойдаланган ҳолда мамлакатнинг ижтимоий - иқтисодий ривожланишини таҳлил қилиш ҳамда келгусида прогнозлаш;

маълумотларни бошқариш учун зарур бўлган услубиятлар ишлаб чиқиш ва татбиқ этиш;

б) Давлат статистика қўмитаси “Маълумотларни бошқариш” ахборот тизимида фойдаланиш учун зарур бўлган маълумотларни:

давлат органлари ва ташкилотларининг очиқ маълумотлар тўпламлари рўйхатига киритиш ва уларнинг ўрнатилган тартибда янгилаб борилишини мувофиқлаштириш;

давлат статистикаси ишлари дастури доирасида шакллантириладиган статистик ва таҳлилий маълумотларни жамланма ҳолатда ва эгаси мавҳумлаштирилган тарзда тақдим этиш;

бошқариш учун зарур бўлган иқтисодий-статистика таснифлагичларни ишлаб чиқиш ва татбиқ этиш;

в) Ахборот технологиялари ва коммуникацияларини ривожлантириш вазирлиги ахборот тизимини электрон ҳукумат тизимлари ҳамда давлат органлари ва ташкилотларининг маълумотлар базаси, ахборот тизимлари билан интеграциясини ҳамда идоралараро электрон ҳамкорлигини самарали ташкил этилишида кўмаклашиш;

ахборот тизимини Ўзбекистон Республикасининг Очиқ маълумотлар порталига интеграция қилишини ва узлуксиз ишлаб туришини таъминлаш;

г) давлат органлари ва ташкилотлари ҳамда маҳаллий ижро этувчи ҳокимият органлари ахборот тизимга жамланиши белгиланган маълумотларни белгиланган рўйхатга ва муддатларга мувофиқ электрон ҳамкорлик орқали тақдим этиш ёхуд тизимга доимий равишда киритишни таъминлаш;

тақдим этилаётган маълумотларнинг ишончлилиги, ҳаққонийлиги ва долзарблигини таъминлаш чораларини кўриш;

д) “Давлат ахборот тизимларини яратиш ва қўллаб-қувватлаш бўйича ягона интегратор UZINFOCOM” МЧЖ ахборот тизимни ишлаб чиқиш, жорий этиш, доимий асосда уни узлуксиз ишлашини ҳамда такомиллаштирилишини таъминлаш.

Белгиланишича:

“Маълумотларни бошқариш” ахборот тизимидан барча давлат органлари ва ташкилотлари ҳамда маҳаллий ижро этувчи ҳокимият органлари беғараз асосда фойдаланадилар.

“Маълумотларни бошқариш” ахборот тизими учун керакли ягона маълумотномалар ва классификаторлар “Электрон ҳукуматнинг маълумотномалар ва классификаторлар регистри” ахборот тизимида юритилади.

Бунда, давлат органлари ва ташкилотлари ўзларининг ахборот тизимларида “Электрон ҳукуматнинг маълумотномалар ва классификаторлар регистри” ахборот тизимида жойлаштирилган маълумотномалар ва классификаторларидан фойдаланишлари шарт.