“Мазкур қўшма корхонага тўғридан-тўғри хорижий инвестиция йўналтирилган. Лойиҳанинг хорижий инвестори – Филиппиннинг “LIWAYWAY LTD GROUP” корхонаси ҳисобланади. Корхона лойиҳаси Филиппинда ишлаб чиқилган бўлиб, у “Nilem Proekt Stroy” МЧЖ томонидан Ўзбекистон Республикаси шаҳарсозлик нормалари ва қоидаларига мослаштирилган.
10 млн АҚШ доллари миқдоридаги инвестиция эвазига бунёд этилаётган лойиҳа учун Қибрай тумани ҳокими қарори билан 1,3 гектар ер ажратилган, бу ерда 4700 кв.метр қурилиш ости бинолари ҳамда 2500 кв.м янги бинолар (офис ва ётоқхона) қурилиши режалаштирилган.
Корхона тўлиқ қувват билан ишга тушганида 300 та иш ўрни яратиш имконини беради. Биринчи босқичда, яъни 2020 йилда 50 та иш ўрни яратилади”, дея Қибрай тумани ҳокимлиги ахборот хизмати раҳбари Ҳабибулла Саъдуллаевнинг сўзларини келтирмоқда Kun.uz мухбири.
Қайд этилишича, корхонада йилига 1000 тонна озиқ-овқат маҳсулотлари ишлаб чиқариш мўлжалланган. Йилига камида 1 млн долларлик маҳсулот экспорт қилишни режалаштирган корхона шу йилнинг сентябрида фаолият бошлаши кутилмоқда.
“Вилоят ҳокими Рустам Холматовнинг топшириғига биноан корхонани белгиланган муддатда ишга туширишга улгуриш учун ишлар икки сменада ташкил этиладиган бўлди. Қурилиш карантин талабларига риоя қилган ҳолда эҳтиёткорлик билан амалга оширилиши қатъий таъкидланди”, дейди Ҳабибулла Саъдуллаев.
