Эрдўған курдларни АҚШдаги тартибсизликларга алоқадорликда айблади 

Икки президент, шунингдек, ўзаро суҳбат давомида Ливия ва Суриядаги ҳамда коронавирус билан боғлиқ вазиятларни муҳокама қилган.

“Президентимиз ўз суҳбатдоши билан АҚШдаги зўравонлик ва талончиликлар ортида турувчи унсурлар Сурия шимолида ҳаракат қилувчи КИП/YPG террорчилик ташкилоти билан алоқага эга бўлиши мумкинлиги ҳақидаги хавотирлари билан бўлишган”, деб маълум қилинган Эрдўған маъмурияти матбуот хизматида.    

Аввалроқ АҚШдаги оммавий тартибсизликларда Россия айбланганди. АҚШнинг собиқ президенти Барак Обама маъмуриятида миллий хавфсизлик бўйича маслаҳатчи бўлган Сьюзан Райс Москва АҚШдаги икки томонни  ижтимоий тармоқлар орқали гиж-гижлашда ва эҳтимол, уларни молиялаштираётганликда айблаган. Россиянинг Венадаги халқаро ташкилотлардаги доимий вакили Михаил Ульянов бу айбловларни инкор этиб, Вашингтон айбдорни мамлакат ичида эмас, балки ташқаридан излашни истаётганлигини қўшимча қилган. 

АҚШда афроамерикалик Жорж Флойд полиция томонидан қўлга олиниши вақтида қўлланган зўравонлик оқибатида вафот этгандан сўнг бир неча кундан бери норозиликлар бўлиб ўтмоқда. Бир қатор ҳолатларда намойишлар тартибсизликлар, полиция билан тўқнашувлар, талончиликлар ва босқинчиликларга айланиб кетган.