Жисмоний тарбия ва спорт тизимида ягона электрон бошқарув тизими жорий этилади

Ўзбекистон Республикаси Жисмоний тарбия ва спорт вазирлиги, Ахборот технологиялари ва коммуникацияларини ривожлантириш вазирлигининг 2020-2025 йилларда жисмоний тарбия ва спорт тизимида ягона электрон бошқарув тизимини жорий этиш тўғрисидаги таклифи маъқулланади.

Қуйидагилар ягона электрон бошқарув тизимининг асосий вазифалари этиб белгиланади:

Ўзбекистон Республикаси Жисмоний тарбия ва спорт вазирлиги ва унинг тизимидаги республика ташкилот ва муассасалар, Қорақалпоғистон Республикаси Жисмоний тарбия ва спорт вазирлиги, вилоятлар ва Тошкент шаҳар жисмоний тарбия ва спорт бошқармалари ҳамда туман (шаҳар) жисмоний тарбия ва спорт бўлимлари тизимига замонавий ахборот-коммуникация технологияларини жорий этиш орқали тизимни яхлит ҳолатга келтириш ҳамда доимий назорат қилиш;

Ўзбекистон Республикаси Жисмоний тарбия ва спорт вазирлиги фаолиятини ягона тизим орқали бошқариш, иш жараёнини режалаштириш ва ташкил этиш, давлат хизматларини кўрсатилиши жараёнларини рақамлаштириш ва бюрократик тўсиқларни янада қисқартириш;

Ўзбекистон Республикаси Жисмоний тарбия ва спорт вазирлиги Жисмоний тарбия ва спорт вазирлиги тизимидаги ташкилотлар ўртасида ҳужжат айланиши ва ҳисоботларни юритишни электрон кўринишда шакллантириш, зарур ҳисобот кўринишидаги бланклар, шакллар ва жадвалларни онлайн тўлдириш орқали реал вақт режимида тузиш;

спорт соҳасида маблағлар ажратилиши, ажратилган маблағларни тўғри тақсимланишини назорат қилиш, тушумлар ва харажатлар шаффофлигини таъминлаш;

ягона электрон бошқарув тизимига киришда фойдаланувчини идентификация қилиш.

2020-2025 йилларда жисмоний тарбия ва спорт тизимида ягона электрон бошқарув тизимини жорий этиш бўйича “Йўл харитаси” тасдиқланади.

Ўзбекистон Республикаси Жисмоний тарбия ва спорт вазирлиги Ягона электрон бошқарув тизимини ишлаб чиқишда қуйидагиларни назарда тутувчи тизимости алоҳида ахборот тизимлари яратилишини таъминлайди:

республикамиз ҳудудларида жисмоний тарбия ва спорт иншоотлари, объектларини қурилиш-таъмирлаш рeжаларининг бажарилиш ҳолатини назорат қилувчи ахборот тизими;

давлат бюджетидан спорт соҳаси учун ажратиладиган маблағлари ҳамда спорт муассасаларининг бюджетдан ташқари маблағлари тақсимланиши ва ишлатилишининг тўлиқ назорат қилинишини таъминловчи ахборот тизими;

болаларни спортга жалб қилувчи турли интерактив ўйинлар, қизиқарли маълумотлар, қисқа муддатли видеороликлар ва ота-оналар учун маслаҳатларга оид маълумотларни ўз ичига олувчи веб портал;

республика миллий ва ҳудудий терма жамоаларига номзодларни тайёрлашда республика чемпионати мусобақаларининг финал босқичларини кузатиб бориш, натижаларини таҳлил қилиш ҳамда рейтингли баҳолаш имкониятини яратувчи ахборот тизими;

спорт таълим муассасалари ўқув жараёнларини мониторинг қилиш, шунингдек, талабалар, спортчи-ўқувчиларнинг шахсий кабинетлари орқали топшириқларни бажариши ҳамда рейтинг натижаларини онлайн кузатиб бориш имкониятини ўз ичига олувчи ахборот тизими;

Ўзбекистон Республикаси Жисмоний тарбия ва спорт вазирлиги тизимидаги ташкилотларда кадрлар фаолияти, уларнинг захираси, рейтинги ва асосий кўрсаткичлари таҳлили тўғрисидаги маълумотларни ўз ичига олган ахборот тизими;

Ўзбекистон Республикаси Жисмоний тарбия ва спорт вазирлиги тизимидаги спорт иншоотларида абонемент ва тўловларни алоқасиз шаклда жорий этиш орқали пуллик хизмат кўрсатиш ахборот тизими;

оммавий спорт тадбирлари, халқаро мусобақалар ва турнирлар, жаҳон ва Осиё чемпионатларини ўтказиш режаларини ва ҳисоботларини юритиб бориш ва назорат қилишини таъминловчи ахборот тизими.

Бунда, ягона электрон бошқарув тизимини ишлаб чиқишда, унинг ҳуқуқий режимини таъминлаш мақсадида лойиҳада ягона электрон бошқарув тизимининг мулкдорини, ундаги маълумотлардан эркин фойдаланиш даражасини ҳамда уни муҳофаза қилиш тартиби назарда тутилади.

Шундай тартиб ўрнатиладики, унга кўра тегишли ахборот тизимлари тўлиқ жорий қилинганидан сўнг, уларнинг имкониятларидан келиб чиққан ҳолда:

спорт ва оммавий жисмоний тарбия тадбирларининг республика ва ҳудудий ҳамда туман (шаҳар) календарь режалари, харажатлари, бажарилган ишлар, ўтказилган тадбирлар бўйича ҳисоботлар мажбурий равишда тизимга киритиб ягона электрон бошқарув тизимида амалга оширилади;

Жисмоний тарбия ва спорт вазирлиги тизимидаги ташкилотлар томонидан спорт иншоотларида кўрсатиладиган пуллик хизматлар бўйича барча амалиёт ягона электрон бошқарув тизими ҳамда ушбу тизимга маълумотларни киритиб бориш орқали амалга оширилади;

Жисмоний тарбия ва спорт вазирлиги тизимидаги ташкилотларда кадрлар билан ишлаш тизими ягона электрон бошқарув тизимига маълумотларни киритиб бориш орқали юритилади;

Жисмоний тарбия ва спорт вазирлиги тизимидаги ташкилотларнинг биноларига, жисмоний тарбия-соғломлаштириш ва спорт иншоотларига, спорт таълим муассасалари биноларига кириб-чиқиш ягона электрон бошқарув тизимида рўйхатга олинган махсус рухсатномалар асосида амалга оширилади;

расмий оммавий жисмоний тарбия ва спорт тадбирлари, спорт мусобақалари, ўқув-машқ машғулотлари иштирокчилари ягона электрон бошқарув тизимида қайд этилган ҳолда тадбирларга иштирок этишга рухсат берилади, уларнинг эришган натижалари ва кўрсаткичлари мажбурий равишда тегишли ахборот тизимига киритиб борилади ва мазкур маълумотлар уларнинг фаолиятини баҳолаш учун асос бўлиб ҳисобланади;

республика ҳудудида фаолият юритувчи хусусий спорт иншоотлари томонидан ягона бошқарув тизимининг тегишли ахборот тизимларидан рўйхатдан ўтади ва ўз спорт иншоотларида мунтазам равишда спорт билан шуғулланувчилар ҳақидаги умумий маълумотларни (спорт турлари бўйича шуғулланувчиларнинг сони, жинси, ёши ва бошқалар) киритиб борадилар ҳамда ушбу маълумотлар ҳудудларда жисмоний тарбия ва спортнинг ривожланиш даражасини белгилашда фойдаланилади;

Жисмоний тарбия ва спорт вазирлиги хусусий спорт иншоотлари томонидан ягона бошқарув тизимининг тегишли ахборот тизимларига ўз спорт иншоотларида мунтазам равишда спорт билан шуғулланувчилар ҳақидаги умумий маълумотларни киритишда, шунингдек, киритилаётган маълумотларнинг шаффофлигини таъминлашда йўл қўйилаётган камчиликларни бартараф қилиш тўғрисида кўриб чиқилиши мажбурий бўлган тақдимномаларни давлат ва хўжалик бошқаруви органлари, маҳаллий давлат ҳокимияти органлари, хусусий спорт иншоотлари муассисларига юборади;

республика ҳудудларида жисмоний тарбия ва спорт иншоотлари, объектларини қурилиш-таъмирлаш рeжаларининг бажарилиши ҳолати тўғрисидаги маълумотлар мажбурий равишда ягона электрон бошқарув тизимига киритиб бориш ва мазкур маълумотлар уларнинг фаолиятини баҳолаш учун асос этиб ҳисобланади.

Қуйидагилар Ўзбекистон Республикаси Жисмоний тарбия ва спорт вазирлиги тизимидаги ташкилотларда ягона электрон бошқарув тизимига замонавий ахборот-коммуникация технологияларини жорий этиш, ягона электрон бошқарув тизимини яратиш ва жорий қилиш чора-тадбирларини молиялаштириш манбалари этиб белгиланади:

спорт иншоотлари ва муассасаларини телекоммуникация тармоқларига уланиши – Ўзбекистон Республикаси Ахборот технологиялари ва коммуникацияларини ривожлантириш вазирлиги маблағлари;

зарурий компьютер ва оргтехника билан таъминлаш, иншоотларни видеокузатув тизимлари ва кириб-чиқиш, ўтиш жойларида турникетлар билан таъминлаш, ягона электрон бошқарув тизими дастурини яратиш ҳамда жорий қилишда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Ўзбекистон Республикаси Жисмоний тарбия ва спорт вазирлигига ажратиладиган маблағлар доирасида, муассасаларнинг ўз маблағлари, ҳомийлар ва қонун ҳужжатларида тақиқланмаган бошқа манбалар ҳисобидан амалга оширилади.

Ўзбекистон Республикаси Жисмоний тарбия ва спорт вазирлиги Ахборот технологиялари ва коммуникацияларини ривожлантириш вазирлиги билан биргаликда мазкур қарор лойиҳаси билан тасдиқланган “Йўл харитаси”да белгиланган муддатларда:

ягона электрон бошқарув тизимини амалдаги ахборот тизимлари ҳамда “Sport.uz” ахборот тизими билан интеграция қилинишини инобатга олган ҳолда ягона бошқарув тизимини яратиш учун техник шартлар, топшириқлар ва технологик тавсифларни ишлаб чиқади ва тасдиқлайди;

тасдиқланган техник топшириқларга мувофиқ ягона электрон бошқарув тизимини жорий этиш ва синовдан ўтказилиши таъминлаш, шунингдек синов натижаларига кўра амалиётда фойдаланишни йўлга қўяди.

Ўзбекистон Республикаси Жисмоний тарбия ва спорт вазирлиги – ягона электрон бошқарув тизимининг юритилиши, ушбу тизимга маълумотлар мунтазам киритилиши ва уларнинг долзарблиги таъминланиши мониторингини амалга оширадиган давлат органи ҳамда буюртмачиси;

Ўзбекистон Республикаси Жисмоний тарбия ва спорт вазирлиги ҳузуридаги “Сертификатлаштириш ва компьютерлаштириш маркази” давлат корхонаси – ягона бошқарув тизими оператори этиб белгиланади.