«Кунига 20 мингдан ортиқ тест олинсаям камлик қиляпти» - Ҳабибулло Оқилов коронавирусга тест олишдаги муаммолар ҳақида

Коронавирусга қарши кураш штаби аъзоси Ҳабибулло Оқилов АОКАда ўтказилган брифингда коронавирусга тест олишдаги муаммолар қай тартибда бартараф этилаётгани ҳақида гапирди.

«Пандемия бошланган пайтда кунига 3 мингта тест олган бўлсак, ҳозирги пайтда 22-24 мингта тест қилиняпти. Марказий СЭОМ ва ҳудудий бўлимларида тест олишга рухсат берилган.

Тошкент шаҳрида иш ҳажми кўпайиб кетгани учун вилоятлардаги СЭОМга анализ қилиш ҳуқуқи берилган. Бу ҳам камлик қиляпти. Яна 45та ПЦР аппаратлари харид қилинди.

Бундан ташқари, 15та шунақа аппаратлар олиб келинади. Яқин орада аппаратлар етишмовчилигига барҳам берилади. Ушбу тестларни оладиган мутахассислар ҳам тайёрладик. Шунингдек, ресурслари етарли бўлган хусусий лабораторияларга ҳам тест қилишга рухсат берилди», деди Оқилов.

Шунингдек, ПЦР аппаратида тест олиш жараёни анча мураккаб ва кўпроқ тажрибани талаб қилиши айтиб ўтилди. Бу йўналишда малакали мутахассислар етишмаслиги ҳам тест олишдаги муаммоларни келтириб чиқарган.

Маълумот учун, Ўзбекистонда коронавирус пандемияси даврида 1,4 миллиондан ортиқ тест олинган.

Соғлиқни сақлаш вазирининг биринчи ўринбосари Баҳодир Юсупалиев Ўзбекистонда 1 миллионта тест захираси борлиги ҳақида маълум қилганди.

Ўзбекистонда тест синовлари етарли даражада ўтказиляптими: дунё давлатлари билан қиёс