Олтиариқдаги чойхонада гиёҳвандлик воситасини 26 миллион сўмга сотган шахс ушланди

Жорий йилнинг 29 июль куни Фарғона вилояти Олтиариқ туманида тезкор тадбир ўтказилган. Бу ҳақда Postda нашри хабар бермоқда.

Тадбир давомида фуқаро Ж.М. Янгиараб маҳалла фуқаролар йиғинида жойлашган чойхонада “гашиш” гиёҳвандлик воситасини 26 миллион сўмга сотган вақтида ушланди. Гиёҳвандлик моддаси ашёвий далил тариқасида олинди.

Фарғона вилояти ИИБ ахборот хизматининг маълум қилишича, ҳолат юзасидан туман ИИБ ҳузуридаги тергов бўлими томонидан жиноят иши қўзғатилиб, фуқаро Ж.М.га нисбатан суд томонидан “қамоққа олиш” тарзидаги эҳтиёт чораси қўлланилди.

“Ҳурматли фуқаролар! Гиёҳвандлик ўсимликларини экиш, истеъмол қилиш, сақлаш, сотиш билан боғлиқ жиноятлар учун қонунларимизда оғир жазолар назарда тутилган. Хусусан, ушбу ҳолат, яъни Жиноят кодексининг 273-моддаси 5-қисмида кўрсатилган жиноятни содир этган шахс йигирма йилгача озодликдан маҳрум қилиш билан жазоланиши мумкин”, - дейилади хабарда.