«Ювентус» Маурицио Саррини истеъфога чиқарди

«Ювентус» расмий сайти клуб Чемпионлар лигаси турнирини тарк этгани сабабли бош мураббий Маурицио Сарри истеъфога чиқарилганлигини эълон қилди.

Фото: AFP

«Ювентус»нинг Италия А Сериясида кетма-кет 9-чемпионлигини қўлга киритиб, клуб тарихида янги саҳифа очган Маурицио Саррига миннатдорчилик билдириб қоламиз. Бу Саррининг Италия футболидаги саргузаштларида ниҳоят чўққини забт этишига имкон яратди», - дейилади клуб баёнотида.

«Ювентус» жорий мавсумда А Серияда «Интер»дан бир очко кўпроқ жамғариб, скудеттони қўлга киритган бўлса-да, «Лион»га қарши ЕЧЛ 1/8 финал икки ўйин натижасига кўра (0:1, 2:1), турнирни тарк этишга мажбур бўлди.

Эслатиб ўтамиз, Сарри 2019 йил ёзида «Ювентус»ни тарк этган Массимилиано Аллегри ўрнига жамоа бош мураббийи сифатида иш бошлаган эди.