«Абитуриентлар тест синовларини энг камида бир-икки марта ишлаб кўришган ёки синов тестлари билан танишишган. Имтиҳонда ҳам худди ўша тестларга ўхшаган саволлар бўлади. Шунинг учун қўрқиш керак эмас.
Имтиҳоннинг шаффоф ва адолатли бўлишини эса биз таъминлаб берамиз. Бу жараёнда тизим жуда яхши ташкиллаштирилган, барчаси жуда қаттиқ назоратга олинган», деди Мажид Каримов.
https://ok.ru/videoembed/1630205577919
ДТМ раҳбари тўғридан тўғри абитуриентларга мурожаат қилди.
«Имтиҳонда сизлардан фақат тўғри жавоб бериш талаб қилинади. Шошилмасдан фикрингизни жамлаб тўғри жавоб беришга ҳаракат қилинг. Биз эса, албатта, тўплаган ҳақиқий балингизни чиқариб берамиз, шаффофликни таъминлаймиз. Сиз фақат тестда иштирок этиб ўз билимини намоён қилинг», деди Мажид Каримов.
Шунингдек, унинг қайд этишича, кириш имтиҳонлари 16-17 сентябрда якунланса, абитуриент талаба бўлгани ҳақидаги жавобни бир ҳафтадан кейин, тахминан 20-22 сентябрь куни билиши мумкин бўлади.
Тана ҳарорати юқорилиги аниқланиб, имтиҳонга киритилмаган ва синовлар якунлангандан 4 кун кейин алоҳида имтиҳон топширган абитуриентлар ҳам ўзларининг талаба бўлганини шу муддатда, 20-22 сентябрда билиб олади.
«Бундай абитуриентлар контингенти катта бўлмайди. Уларнинг жавобини бир кунда чиқариб, умумий натижага қўшиб юборишимиз мумкин», деди ДТМ раҳбари.
