Ўтган ўқув йилига қабул 20 июндан бошланган эди. Бу йил ҳам тахминан шу санага яқин қабул бошланишини ҳисобга олсак, абитуриентларда қисқа вақт қолди. Бу йилги қабулда абитуриентларни нималар кутяпти?
ДТМ номи ўзгарди
Абитуриентларга оид янгиликлардан бири сифатида кўпчилик фақат “ДТМ” деб қисқача номлайдиган тест ўтказувчи ташкилот Давлат тест марказининг қайта ташкил этилиб, номи Билим ва малакаларни баҳолаш агентлиги шаклида ўзгарганини айтиш мумкин.
Қисқача айтганда, ДТМ сўзи тарихга айланди.
Қанча абитуриент ҳужжат топшириши мумкин?
Ўтган йилги қабулда 1,2 млн абитуриент ОТМга кириш учун ҳужжат топширган. Уларнинг 395 минг нафари ўша йилги битирувчилар, қолган 819 209 нафари олдинги йилларда таълим муассасаларини тугатган битирувчилар эди.
Мактаб ва мактабгача таълим вазирлиги берган маълумотларга кўра, 2023 йилда мактабларни 390 мингдан ортиқ ўқувчи тугатади. Уларнинг сони ўтган йилги битирувчилар сони билан деярли тенг. Билим ва малакаларни баҳолаш агентлиги Kun.uz’га тақдим этган маълумотга кўра, бу йилги қабулда 1 млн 260 минг абитуриент ҳужжат топшириши кутиляпти.
Мактабда олинган ўртача баҳо кириш имтиҳонидаги умумий баллга қўшиб берилиши мумкин
Гарчи Вазирлар Маҳкамасининг бунга оид қарори тасдиқланган бўлса-да, лекин жорий йилдан бошлаб битирувчилар баҳоси ОТМга киришда ҳисобга олиниши ҳақида бошқа бирор янгилик эълон қилинмади.
Лекин агар бу тартиб ишга туширилса, абитуриентларга кириш имтиҳонларида тўплаган баллига максимал 5 баллгача қўшиб берилииши керак.
Бунда шу йил таълим муассасасини тугатган абитуриент ОТМга онлайн ҳужжат топшираётган пайти унинг мактабда тўплаган (коллеж, лицей) ўртача балли электрон платформада акс этади ва абитуриент унинг тўғрилигини тасдиқлайди. Айни шу балл кейин имтиҳонда тўплайдиган баллига қўшилади.
Ётоқхонага эҳтиёжи борлигини белгилаш мумкин
Энди абитуриент кейинчалик талаба бўлгач, ётоқхонада яшашга эҳтиёжманд бўлиши ёки йўқлигини ҳужжат топширгандаёқ белгилай олиши мумкин. Лекин бунга оид тартиб ҳозирча фақат қарор лойиҳасида акс этган. Агар ушбу қарор лойиҳаси тасдиқланса, Билим ва малакани баҳолаш агентлиги томонидан 2023-2024 ўқув йилидан бошлаб абитуриентлар учун давлат олий таълим муассасаларига ўқишга ҳужжат топшириш жараёнида талабалар турар жойига бўлган эҳтиёжини белгилаш имконияти яратилади.
Имтиҳон ва максимал балл ҳақида
Бу йилги қабул учун фанлар мажмуаси анча олдинроқ, декабр ойида тасдиқланган эди. Унга кўра, йўналишларга имтиҳон олинадиган фанлар биринчи ва иккинчи фан қилиб даражаланган.
Бундан ташқари, абитуриентлар мажбурий фанлар блокида математика, она тили ва Ўзбекистон тарихидан ҳам имтиҳон топширади.
Билим ва малакаларни баҳолаш агентлиги сайтида ҳар бир фандан намунавий тест топшириқлари жойлаштирилган.
Ўтган йилги баҳолаш мезонларига кўра, кириш имтиҳонларида 5 та фандан жами 90 та савол: мутахассислик блокидаги 2 та фан учун 60 та савол (биринчи блокда 30 та, иккинчи блокда 30 та) мажбурий фанлар блокида эса 10тадан 3 та фан учун жами 30 та савол бор эди. Максимал тўпланиши керак бўлган балл эса 189 балл эди. Ҳозирча фанлар мажмуаси тасдиқланган бўлса-да, баҳолаш мезонлари тасдиқлангани йўқ. Шунинг учун бу йил ҳам максимал балл 189 балл бўладими ёки йўқми аниқ эмас.
Миллий сертификат берадиган имтиёз
Абитуриентлар ўзлари истаган фандан анча олдин сертификатга эга бўлиши ва кириш имтиҳонида шу сертификатга мос равишда пропорционал ёки максимал баллга эга бўлиши имкони яратилган.
Ҳозирги пайтгача математика, физика, кимё, биология, она тили ва адабиёт, рус тили, қорақалпоқ тили ва адабиёти бўйича сертификат имтиҳонлари ўтказилди. Май ойида эса биринчи марта тарих ва география бўйича ҳам имтиҳон ўтказилади.
Лекин миллий сертификат имтиҳонида максимал балл тўплаганлар сони унчалик кўп эмас. 28 март ҳолатига кўра, жами 371 киши сертификат имтиҳонида максимал баллга эга бўлолган. Ва уларга кириш имтиҳонида ҳам ўзлари сертификат олган фандан максимал балл берилади.
Қабулга оид қайси савол сизга қизиқ? Уни бизга ёзиб юборинг, биз эса сизнинг саволингиз бўйича маълумот беришга ҳаракат қиламиз.
