АҚШ-Хитой компанияси Lucid Motors янги электрокарини тақдим этди. Air деб номланган моделнинг савдоси 2021 йилда бошланади. Ушбу модел Tesla электромобиллари рақобатчиси бўлиши эътироф этилмоқда.
Машинанинг топ версияси Air Dream Edition деб номланади. У умумий кучи 1095 от кучини берувчи иккита электр мотор билан жиҳозланади. Машина турган жойидан 100 км/соатгача тезлашиши 2,5 сонияни ташкил қилади. У бир қувватланишда 810 км йўл боса олади. Таққослаш учун, Tesla Model S моделининг энг кучли версияси Long Range Plus бир қувватланишда 647 км йўл боса олади.
2021 йилнинг 2-чорагида янги моделнинг Lucid Air Grand Touring деб номланган, 800 от кучига эга модификацияси сотила бошланади. Ушбу машина бир қувватланишда 830 км йўл боса олади. Унинг максимал тезлиги 270 км/соатни ташкил қилади.
Бундан ташқари, компания 2021 йил охирида Air Touring’нинг 620 от кучига эга версиясига буюртмалар олишни бошлайди. Ушбу машина бир қувватланишда 653 км йўл ўта олади. Машинанинг максимал тезлиги 250 км/соатни ташкил қилади. У турган жойидан 100 км/соат тезликкача 3,2 сонияда эриша олади.
