Табиат суратлари биз билан бир сайёрада яшайдиган жонзотларга диққат билан назар ташлашга ундайди. Кундалик ҳаётда эътибордан четда қоладиган майда тафсилотлар, ҳайвонларнинг қизиқарли хатти-ҳаракатлари ва кутилмаган ҳолатлари фотографлар объективида бутунлай бошқача кўринади.

BIAZA Photo Competition 2026 танлови ҳам ана шундай лаҳзаларни бир жойга жамлади. Унга Буюк Британия ва Ирландиядаги ҳайвонот боғлари, аквариумлар ҳамда табиий яшаш муҳитида олинган суратлар тақдим этилди. Улар орасида ҳайвонларнинг таъсирчан портретлари, ҳаётидаги кулгили саҳналар ва яқиндан қарагандагина кўзга ташланадиган ғайриоддий жиҳатлар бор.

Танловни Британия ва Ирландия ҳайвонот боғлари ҳамда аквариумлари ассоциацияси — BIAZA ташкил этди. Ҳакамлар 800 дан ортиқ ишни кўриб чиқиб, етти йўналиш бўйича ғолиб ва совриндорларни аниқлади. Сараланган кадрларда сутэмизувчилар ва қушлардан тортиб, судралиб юрувчилар, балиқлар ҳамда митти умуртқасизларгача акс этган.

Аёзли тонгдаги ғайриоддий қуш

«Қушлар» йўналиши ғолиби — «Аёз оғушидаги гўзаллик». Суратда грифсимон цесарка тасвирланган. © Gareth Clifford.

Фотограф ушбу кадрни январь ойи бошида, тонг отаётган пайтда суратга олган. Тасвир Норфолк графлигидаги Уататунга қўриқхонасида олинган бўлиб, муаллиф керакли лаҳзани ушлаш учун анча ҳаракат қилган.

Грифсимон цесаркалар ғайриоддий ташқи кўриниши билан ажралиб туради. Аёзли тонгда олинган бу сурат қушнинг ўзига хос қиёфасини намоён этиб, танловнинг энг сара ишларидан бирига айланди.

Лой ваннасидан завқланаётган фил

«Сутэмизувчилар» йўналиши ғолиби — «Мен ҳали ҳам кўтариляпман». Суратда Африка фили акс этган. © Thomas Harris.

Ёмғирли кунларнинг бирида фотограф Томас Харрис Опал лақабли урғочи филни лой ваннасидан завқланаётган пайтида суратга олди. Филнинг ана шу ҳолати акс этган кадр муаллифга ўз йўналишида ғолиблик келтирди.

Колчестер зоология жамияти қарамоғида тўртта Африка фили бор. Ташкилот уларни парваришлаш билан бирга, табиатни муҳофаза қилишга қаратилган лойиҳаларда ҳам иштирок этади.