Давлат ташқи қарзи мақсадли сарфланяптими? Иқтисодчи билан суҳбат

Иқтисодий тараққиёт ва камбағалликни қисқартириш вазирлиги ҳузуридаги Прогнозлаштириш ва макроиқтисодий тадқиқотлар институти лойиҳа раҳбари, иқтисод фанлари доктори, профессор Одил Олимжонов Kun.uz билан суҳбатда ташқи қарз тушунчаси, ундаги қоидалар ва хатарлар, шунингдек, ташқи қарзни бошқариш масалаларига тўхталиб ўтди.

Олимжоновнинг айтишича, қарз олинган маблағлардан тўғри фойдаланиш масаласида муаммо бўлиши мумкин. 

«Мутахассис, раҳбар, элим ва юртим деб ишлайдиган одам бу пуллардан тўғри фойдаланади. Минг афсуски, тан олиш керак: ичимизда олчоқлар, ватан манфаатларини бир четга суриб, фақат ўз чўнтагини ўйлайдиганлар ҳали бор. Шундай ҳодиса бўлиши мумкин. Бундай ҳолатлар ҳужжат бўйича текширилади. Кимдир шу каби аҳмоқона иш қилса, сал кейин маълум бўлади. Тўғри, Молия вазирлигининг махсус ташкилоти бор, Ҳисоб палатаси мавжуд, улар вақти-вақти билан пуллардан оқилона фойдаланишни назорат қилиб туради. 

Ўйлайманки, давлат ташқи қарзини ҳамма оляпти, деб ҳисоблаш мақсадга мувофиқ бўлади. Қайсидир қишлоқда яшаётган шахс ўша ерда бўлаётган қурилишдан бўлаётган ўзлаштиришни пайқаса, жамоатчиликка хабар бериши керак», — дейди у. 

Коррупцияга қарши курашиш агентлиги директори Акмал Бурхонов Kun.uz'га берган интервьюсида «коррупцияни келтириб чиқарувчи омилларни йўқ қилиш учун шаффофликни ошириш зарурияти» ҳақида гапирганди. 

Молия вазирлиги август ойи якунида, асосан ташқи қарз ҳисобидан шакллантирилган, Инқирозга қарши кураш жамғармаси маблағларининг сарфланиши бўйича маълумотларни очиқлаганди.