Тожикистонда Ўзбекистон маблағлари ҳисобига қурилган янги мактаб фойдаланишга топширилади 

Тожикистон таълим ва фан вазири Маҳмудюсуф Имомзода ва Ўзбекистон халқ таълими вазири Шерзод Шерматов Сўғд вилояти Спитамен туманида янги ўрта мактабнинг очилиш маросимида иштирок этади, деб хабар берди «Азия-Плюс»га Сўғд вилояти раҳбари маъмуриятидаги манбаси.

640 ўқувчига мўлжалланган мактаб Ўзбекистоннинг давлат бюджети маблағлари ҳисобига қурилди ва жиҳозланди. Уни қуриш тўғрисидаги битим Ўзбекистон президенти Шавкат Мирзиёевнинг 2018 йил март ойида Тожикистонга давлат ташрифи чоғида имзоланган.

Мактабнинг очилиш маросими 27 сентябрга белгиланган.

Икки томонлама келишувларга кўра, Спитамендаги мактабдан ташқари, ўзбек томони Хатлон вилояти Кубодиён туманида 200 ўринли шифохона қурмоқда.

Тожикистон, ўз навбатида, Самарқанд шаҳрида 640 ўқувчига мўлжалланган мактаб ва Фарғона вилоятининг Риштон туманида мактабгача таълим муассасаси қурилиши тўғрисида эълон қилган.