Америкалик олимлар организмда коронавирусга қарши антитаначалар қанча вақт қолишини аниқлади 

COVID-19 коронавирус инфекциясини келтириб чиқарадиган SARS-CoV-2 вирусига қарши антитаначалар даражаси касалликни енгил ёки ўрта даражада ўтказган одамларда тахминан беш ой давомида сақланиб қолади. Нью-Йоркдаги Маунт Синай тиббиёт маркази олимлари шундай хулосага келди, тадқиқот натижалари Science журнали томонидан эълон қилинди, деб ёзмоқда «РБК».

Тадқиқотда коронавирус тасдиқланган 30 мингга яқин киши иштирок этди. Олимларнинг таъкидлашича, антитаначалар қайта касалланишдан ҳимоя қилиши ёки касаллик қайта юқтириб олинса, вирусни сусайтириши мумкин. 

Лондон Империя коллежи олимлари томонидан ўтказилган аввалги тадқиқотга кўра, коронавирус касаллигидан кейин антитаначалар бир неча ой ичида шундай даражага тушиб кетиши мумкинки, бунда улар қайта юқтириб олиш хавфидан сақламай қўяди. Тадқиқотчилар асимптоматик COVID-19 қайд этилган беморларда антитаначалар даражаси айниқса тез пасайишини аниқлади. Шунингдек, тадқиқотчиларнинг билдиришича, 75 ёшдан ошган беморларда антитаначалар тезда йўқ бўлиб кетади.

Аввалроқ, Ўзбекистонда коронавирусга қарши курашиш штаби аъзоси Барно Абдусаматова вирус енгил тарзда ўтказилса, антитаначалар миқдори кўп бўлмаслигини айтганди.

«Ёшлар ва саломатлиги яхши бўлган кишиларда антитаначалар тезроқ шаклланади. Ёши катталар ва ҳамроҳ касалликлари бўлган инсонларда шаклланиши қийинроқ кечади. Шу сабабдан ҳар қандай оғир касалликларда улар бошқа нормал саломатликка эга одамлардан кўра кўпроқ азият чекишади», - деди Барно Абдусаматова.