Flydubai авиакомпаниясининг FZ1073 рейсида бўлган Янив Хаюн исм-шарифли йўловчиси захира борти орқали Тел-Авивга борганидан кейин Исроил бош вазири Бинямин Нетаняҳу билан учрашди. У бу вақтда ҳамон қонга беланган футболкасида эди.
Исроил ҳукумати ҳодисани «террорчилик ҳужумини амалга оширишга уриниш» деб баҳоламоқда. Ҳодиса юзасидан тергов жараёни давом этмоқда, гумонланувчининг мотивлари ҳақида ҳали расмий баёнот берилмади.
Flydubai авиакомпанияси эса суриштирув ишлари якунланмагунча Тел-Авивга парвозларни тўхтатган.
Хаюн иккинчи учувчини зарарсизлантирганидан кейин самолётдаги вазият барқарорлашган, бортга йўловчи сифатида чиққан бошқа икки учувчи эса самолётни Саудия Арабистонининг Тобук шаҳридаги аэропортга фавқулодда қўндирган.
«Учувчилар креслосида ҳеч ким йўқ эди»
Касби сантехник бўлган Хаюн бош вазир билан суҳбат чоғида самолёт тўсатдан баландликни йўқота бошлаганда ва икки дақиқадан камроқ вақт ичида 5,2 минг метрга пастлаганида қандайдир нохушлик рўй берганидан шубҳаланганини айтади.
«Кимдир қичқира бошлади, свет ўчди», – дейди Янив Хаюн Исроил бош вазири эълон қилган видеоёзувда.
Шундан кейин у бошқа йўловчилар билан бирга учувчилар кабинаси эшигини очишга ҳаракат қилган, аммо бу осон иш эмасди.
«Пичоқдан жароҳатланган учувчи эшикка ёпишиб турганди, шунинг учун биз уни очишга қийналдик», – дейди Хаюн.
Аммо, унинг сўзларига кўра, яраланган учувчи ҳушини йўқотишдан олдин эшикни очиб юборишга улгурган.
«Мен ичкарига кирганимда ҳужум қилган учувчи бошқарув панели ёнида, икки кресло ўртасида турганини кўрдим… учувчилар креслоларида ҳеч ким йўқ эди. Бири полда ётар, бошқаси бошқарув панели устида эди. Ортимдан кабинага яна бир йигит кирди. Мен ҳужум қилган учувчига ташланиб, бўғиш усулини қўлладим ва ташқарига олиб чиқдим», – деган Хаюн.
Унинг айтишича, иккинчи учувчи «самолётни ишдан чиқариш учун бошқарув панелини синдириб ташлашга» ҳаракат қилган.
