Объект юзларига ниқоб таққан, эгнига жарроҳлар кийими ва қўлларига резина қўлқоп кийиб олган қўриқчилар томонидан иҳоталанган. Аэропортнинг бу қисмига кириш учун ё икки ҳафталик карантиндан ўтиш ёхуд фавқулодда ҳолатларда кийиладиган либосда бўлиши шарт.
Махсус жиҳозланган ушбу хоналар Хитойнинг назорат органларидан тез орада тасдиқ олиниши кутилаётган коронавирусга қарши вакциналар учун мўлжалланган. Айнан шу ердан ҳарорат назорат қилинадиган юк самолётларига ортилиб, дунё бўйлаб буюртмачиларга етказилади.
Хитой ҳукумати синовлардан муваффақиятли ўтган вакцинани тақдим қилиб, пандемияга сабаб бўлиш орқали путур етган ўз имижини бироз бўлсада яхшилаш илинжида.
«Вакциналар, шунингдек, «расмий Пекин томонидан кўринмас қудратни намойиш этиш ва халқаро майдондаги таъсирни оширишда инструмент сифатида қўлланиши ҳам мумкин», дея фикр билдирди Вашингтонда жойлашган халқаро алоқалар кенгаши ходими Янжонг Хуанг. Пандемиянинг илк кунларида ўзини «оқлаш»га уринган Хитой юз ниқоблари ва бошқа зарур буюмларни вирусдан жиддий зарар кўрган давлатларга тарқатганди. Кейинчалик етказиб берилган буюмларнинг сифатига эътироз билдирилган ва Хитой ҳукумати коронавирус ҳақидаги маълумотларни сохталаштиришда айбланганди.
«Вакцина дипломатияси Хитой учун яна бир имкониятдир», деб фикрини якунлаган Янжонг Хуанг.
Вакцина дипломатияси нима?
Хитойда коронавирусга қарши вакциналар бўйича бир неча ишланмалар устида тадқиқотлар кетяпти. Уларнинг бир нечтаси сўнгги фазага етиб борган ва назорат органлари томонидан фойдаланишга тасдиқни кутишяпти.
Хитой ҳудудида коронавирус деярли «мағлуб этилгани» боис, тадқиқотчи компаниялар ўзлари ишлаб чиқаётган вакцинани синаб кўриш учун бошқа давлатлар билан келишувга эришишди. Бунинг эвазига синовлар муваффақиятли ўтиб, вакцина рўйхатдан ўтгач, уларга биринчилардан бўлиб етказиб берилиши, ҳатто препарат ўша давлатда ишлаб чиқарилиши ваъда қилинди.
Хитойнинг Sinovac Biotech, CanSino Biologics компаниялари Бразилия, Мексика, Туркия, Индонезия каби давлатлар билан синовлар ўтказиш ва пировардида вакцина етказиб бериш бўйича битимлар имзоланди. Индонезияда эса вакцина ишлаб чиқариш бўйича келишилди.
Хитой ҳукуматига тегишли China National Pharmaceutical Group (Sinopharm) гигантининг бир қисми бўлган China National Biotec Group (CNBG) лабораторияси эса, қадамни каттароқ ташлаяпти. Компания вакцинанинг уч фазадаги синовларини Осиё ва Жанубий Америкадаги 10 давлатда ўтказди. Синовларда Дубай амири шайх Муҳаммад ибн Рашид ол-Мактум ҳам кўнгилли сифатида қатнашди.
