Балиқчи туманидаги хайрия акциясида боқувчисиз қолган 500 та оилага 1 тоннадан кўмир тарқатилмоқда

Оққўрғон масжиди имом хатиби Рустамжон домла Ҳамидов туман ҳокими Жасурбек Абдурайимов билан ҳамкорликда кўплаб мана шундай хайрия лойиҳаларини ташкил этиб келмоқда.

Бундай хайрли ишларни эътироф этган ҳолда, ибрат намунаси сифатида кенг жамоатчиликка хабар беришни лозим топдик.

Шу мақсадда лойиҳа ташкилотчиси – Оққўрғон масжиди имом хатиби Рустамжон домла Ҳамидов билан бирга 500 та муҳтож оилага 1 тоннадан кўмир тарқатиш жараёнида қатнашдик.

Мазкур хайрли ишга жуда кўплаб саховатли инсонлар ҳисса қўшмоқда. Турли ёшдаги ўнлаб кўнгиллилар келтирилган кўмирларни саралаш, қоплаш ва эгаларига етказиб беришда холис ёрдам бераётганига гувоҳ бўлдик.

Рустамжон домла Ҳамидовнинг айтишича, боқувчисиз қолган оилалар рўйхатидаги 500 та оиланинг аксарияти қишлоқларда яшайди.

«Бу оилаларни қишнинг совуқ кунларида кўмир ва бошқа иситиш билан боғлиқ муаммоларини ҳал этишга баҳоли қудрат ҳаракат қиляпмиз. Боқувчисиз қолган болажонлар яшаётган хонадонларга кўмир етказиб берсак, марра бизники. Лекин бу ишларимиз мақтанишга арзимайди деб биламан. Хайрия ишларимиз саховатли инсонларнинг кўмаги билан бўляпти.

Пайғамбаримиз Муҳаммад соллаллоҳу алайҳи васаллам айтганлар: «Қайси бир одам бошқа бир биродарини ташвиши билан юрар экан, ундаги ғамни аритмоқчи бўлар экан, Аллоҳ бу одамнинг ташвишини аритади». Шу кунларда карантин, совуқ сабабли қийналган одамлар кўп. Қийналган инсонларга ёрдам берайлик. Шунда Аллоҳ бизга ёрдам беради», – дейди Рустамжон домла.

Биз саховатли инсонлар ва туман ҳокимлиги кўмагида боқувчисиз қолган оила фарзандларига қуриб битказилган ва қурилаётган уйларни ҳам бориб кўрдик.

2019 йилнинг ўзида 22 та боқувчисини йўқотган оилалар уйли-жойли бўлибди. Қурилаётган уйларда яшаш учун барча шарт-шароитлар борлиги эътиборимизни тортди.

Лойиҳа ташкилотчилари савобли ишга туман ҳокимлиги катта ҳисса қўшаётганини таъкидлаб ўтишди. Умид қиламизки, мана шундай хайрли ишлар бардавом бўлади.

Элмурод Эрматов,
Аҳрорбек Ёқубжонов.