Сенатдаги импичментда ҳимоя қилиш учун ёлланган адвокатларнинг барчаси Трампни тарк этишди

Америка нашрлари маълумотига кўра, бу қарор икки томонлама келишув билан қабул қилинган, ҳамкорлик тўхтатилишига сабаб ҳимоя тактикаси борасидаги келишмовчиликлар бўлган.

«Ассошиэйтед пресс» адвокатлар доираларидаги манбасига асосланиб хабар беришича, Трамп ўз ҳимоясини президентлик сайловларидаги сохталиклар (у далил келтирмасдан демократларга айб қўйиб келмоқда) мавзуси устига қурмоқчи бўлган, аммо адвокатлар унинг бу таклифига кўнишмаган

Шунингдек, Жанубий Каролинадан бўлган собиқ федерал прокурорлар - Грег Ҳаррис ва Жонни Гассер, Шимолий Каролинадан бўлган ҳуқуқшунос Жош Ҳауард ҳам Трамп адвокатлари жамоасини тарк этишган.

Бу адвокатлар жамоасини Трампнинг ҳимояси учун кичик Жорж Буш президентлиги даврида адлия вазирлигида ишлаган Бутч Бауэрс йиққанди.

Эндиликда иккинчи импичмент бўйича эшитувлар вақтида Трампнинг манфаатларини ким ҳимоя қилиши маълум эмас. 

«Биз жуда кўп ишни амалга оширдик, аммо юридик вакилларимиз бўйича якуний қарорга келмадик, бу тез орада маълум бўлади», дея ёзган твиттерда Трампнинг маслаҳатчиси Жейсон Миллер адвокатлар гуруҳи тарқалиб кетгани ҳақидаги хабар ортидан.

Январ ойининг биринчи ярмида АҚШ Вакиллар палатаси Дональд Трампга нисбатан иккинчи импичментни ёқлаб овоз берди. Трамп 6 январ куни, унинг тарафдорларидан иборат оломон Конгресс биносига бостириб кириб, президент сайловларининг якунлари тасдиқланишига халақит беришга уринганидан кейин «қўзғолонга даъват этиш»да айбланди. Капитолийдаги тартибсизликлар вақтида беш киши ҳалок бўлганди. Демократлар фикрича, тартибсизликлар АҚШда демократияга таҳдид солган, шу сабабли Трамп уларнинг сабабчиси сифатида жавобгарликка тортилиши керак. 

Сенат бу ишни кўриб чиқишни 8 февралда бошлайди, Трамп президент лавозимини тарк этиб бўлгани бу иш кўриб чиқилишига халал бермайди. Сенат собиқ президентни қораласа, у пенсия ва имтиёзлардан (вазирнинг йиллик маошига тенг бўлган бир умрлик давлат пенсияси - 221 минг доллар, АҚШнинг исталган нуқтасида офис ижараси учун харажатлар қопламаси, сафарлар учун тўлов - йилига бир миллион долларгача, давлат дафн маросимлари ҳуқуқи, бевасининг яшаш харажатлари), ҳатто «АҚШга хизмат қилувчи ҳар қандай фахрий, масъулиятли ёки даромадли лавозимни бажариш» ҳуқуқидан ҳам маҳрум қилиниши мумкин. Яъни Трампга келажакда президент лавозимини эгаллаш тақиқланиши мумкин.

Аммо собиқ президент қораланиши учун сенаторларнинг учдан икки қисми буни ёқлаши керак. Ҳозирча бунинг эҳтимоли паст, юқори палатада бундай қарор чиқарилиши учун 67 сенатор овози керак, палатадаги демократлар эса 50 овозга эга. Шу билан бирга, лавозимга тақиқ қўйиш учун шунчаки кўпчилик овоз талаб қилинади, уни эса Ҳаррис ёки Трампга қарши бўлган республикачилардан яна кимдир таъминлай олади.

Трамп - АҚШ тарихидаги икки марта импичментга йўлиққан илк президент бўлди.

2019 йилда Вакиллар палатаси уни лавозим ваколатларини суиистеъмол қилишда ва Конгресс фаолиятига тўсқинлик қилишда айблаб импичмент эълон қилганди. Аммо Сенатда кўпчиликни ташкил қилган республикачилар уни оқлашганди.

Ўтган ҳафтада 50 нафар республикачи сенатордан 45 нафари собиқ президентлар лавозимдан кетганидан кейин импичмент қилинмаслиги мумкинлиги туфайли эшитувларни бошланишидан тугатиш учун овоз беришди.