Германиянинг BioNTech компанияси АҚШнинг Pfizer компанияси билан бирга 2022 йилда коронавирусга қарши 3 млрд доза вакцина ишлаб чиқариш учун ўз қувватларини оширмоқчи. Бу ҳақда BioNTech бош директори Угур Шахин маълум қилди.
Унинг таъкидлашича, ишлаб чиқариладиган вакциналар миқдори талаб ва қўшимча эмлаш кампанияларини ўтказиш заруратидан келиб чиқади. Шахиннинг айтишича, BioNTech ва Pfizer умумий ҳисобда 1,3 млрд доза вакцина етказиб бериш бўйича келишувлар тузган.
Bloomberg ахборот агентлигининг хабар беришича, Pfizer 2021 йилда вакцина сотишдан 15 млрд доллар тушум олишни кутмоқда.
Шахиннинг маълум қилишича, BioNTech коронавируснинг бардошлироқ янги турларига қарши вакцинанинг учинчи дозаси билан эмлаш таъсирини ўрганиш бўйича тадқиқот олиб бормоқда. Унинг айтишича, компания бундай эмлаш учун қўшимча дозалар етказиш бўйича музокаралар олиб бормоқда. Шунингдек, вакцинанинг коронавируснинг африкача мутациясига қарши самарадорлигини ўрганиш бўйича тадқиқот натижалари 6-8 ҳафта ичида пайдо бўлади.
1 февралда BioNTech 2020 йилда коронавирусга қарши 2 млрд доза вакцина ишлаб чиқармоқчилигини маълум қилган. Компания бунинг учун ишлаб чиқариш ҳажмини 50 фоиздан кўпроққа оширади.
