Эрон махсус хизматларининг фитналари амалдаги ва собиқ америкалик мулозимлар учун туғдираётган хавф «янада жиддийроқ босқичга» етган ва бу ҳолат молия вазири Скотт Бессентга ҳам тааллуқлидир. Бу ҳақда вазиятдан хабардор бўлган уч манба The New York Times нашрига маълум қилди. Уларнинг сўзларига кўра, айни шу сабабли Бессент Вашингтондаги уйидан ҳарбий базага кўчиб ўтган.
Вазир август ойидан буён Эронга иқтисодий босим ўтказиш, санкцияларни кучайтириш ва савдони чеклаш орқали уни молиявий жиҳатдан яккалаб қўйиш бўйича кампанияга бошчилик қилиб келмоқда. Ушбу фаолияти уни маъмуриятдаги Эрон энг кўп зарар етказмоқчи бўлган мулозимлардан бирига айлантирди, аммо мазкур таҳдид қай даражада жиддий экани ҳозирча ноаниқ қолмоқда, деди NYT манбалари.
Вазият билан таниш манба Reuters агентлигига Бессентнинг хавфсизлигига доир хавотирлар The Wall Street Journal нашри унинг Жоржтаун университети яқинидаги ҳашаматли ҳовлиси аэрофотосуратини эълон қилганидан сўнг кучайганини айтган. Бессент ушбу ҳовлини 2025 йил январида молия вазири лавозимига тасдиқланганидан кўп ўтмай 12,5 миллион долларга сотиб олган эди.
Агентлик манбаси таъкидлашича, ушбу сурат Бессент уйининг геолокациясини аниқлаш имконини берарди, шу боис хавфсизликни таъминлаш мақсадида у ҳарбий базага кўчирилган. «Оммавий ахборот воситалари давлат амалдорларига нисбатан таҳдидлар кучайиб бораётган бир шароитда масъулият билан ҳаракат қилиши шарт», — деб қўшимча қилган у.
Вашингтон Эронга иқтисодий босим ўтказиш орқали унинг раҳбарларини АҚШ билан музокараларда ён беришга мажбур қилиш ҳамда америкалик сайловчилар орасида умуман маъқулланмаётган ҳарбий ҳаракатлар қайта бошланишининг олдини олишга умид қилмоқда. Бессент ва маъмуриятнинг бошқа вакиллари бу кампания ўз самарасини бераётганини, хусусан, иқтисодий пасайиш, миллий валютанинг қадрсизланиши ва Эронда турмуш даражасининг кескин тушиб кетишига сабаб бўлганини таъкидламоқда.
Бироқ АҚШ разведкаси Эрон раҳбарияти қандай қилиб бўлмасин ҳокимиятни сақлаб қолиш ниятида эканини билдирмоқда. Шу сабабли фақатгина иқтисодий қийинчиликлар туфайли режим ўзгариши ёки унинг томонидан жиддий ён беришлар бўлмаслиги мумкин, деб хабар қилган NYT нашрига разведка маълумотларидан бевосита хабардор бўлган америкалик икки расмий.
